鳳城酒家

6-5-10 星期四

今日提早慶祝母親節

尋日打電話問妹妹去邊到食飯

諗都唔洗諗，鳳城吖

(其實，我都預咗喇，因為隻雞真係好得我地歡心)

拼盆，我地要咗中size，但其實我覺得唔係好夠食

拼盆有 : 乳豬，乳豬皮好鬆化
海蜇，夠爽口，不過少咗啲
生腸，我無食
豬腳，我無食
花生，墊底數十粒

炸蟹鉗

係要預定的，亦都係一定要食到

蟹肉冬瓜羹

一早已講明唔食翅，亦唔準佢地食翅
再食翅的話2048年就無魚食架喇
雖然，我係唔食魚嘅，但我都唔可以咁自私
出到幾多力咪出囉，講一聲唔食翅唔係好難咋
又雖然，2048年我都可能已經唔係到
但下一代點呢?大家諗下，思考下啦
全球食翅冠軍是香港呀

蟹肉冬瓜羹好好味架

果汁牛仔柳

說穿了都是有加梳打粉呢，不過唔係好重手
無乸到一pat嘢咁算好喇

鮮魚兩食 :
枝竹炆頭腩

頭腩好多骨，食咗一啖之後，死都唔肯再食
激到媽媽紮紮跳
食配料，枝竹入晒味好好食呀
冬菇又入晒味好好食呀

家鄉炒斑球

呢個都有少少骨，都係食咗一啖又唔肯食
又激到媽媽紮紮跳
又係食配料，翠玉瓜夠爽口
雲耳又好好食
係唔食魚囉，死都唔肯食

蝦醬通菜吊片

鮮魷好韌，通菜好老，蝦醬唔香

香酥生炒骨

一聞，酸味搶鼻，入口都係一個字酸
不過我又唔怕酸，越食越好食

炸子雞

我地為咗雞而黎架
皮脆，肉嫩，雞胸都嫩
服務生話係新鮮雞，我唔信，似冰鮮多啲囉
呃我條脷，哼~~~

呢個都係要預訂 : 西米焗布甸

今次差咗，墊底蓮蓉少咗
下次預訂前，叫佢加多啲蓮蓉先得

母親節當然有禮物啦

化妝袋一個，比媽咪裝啲濕星嘢

呢餐埋單$1,600

下次黎我唔會再叫牛仔柳

生炒骨都係諗下叫唔叫好

通菜嗰碟咁嘅嘢都可以唔洗叫

仲有鍋貼大明蝦都可以唔叫，油到爆炸

咁無咩好食喇喎，仲黎唔黎呀?