芝士薯片

呢隻芝士味薯片，芝士味唔算好出

不過薯片波浪型設計，甚得我歡心呢

應酬

12-7-10 星期一

朝早一返到公司無電

咁我就攞部電腦去鰂魚涌整喇

好彩返到公司之後，已經整返好喇

最仲要係有冷氣嘛

夜晚仲要去應酬

拖住極疲累嘅驅殼去食飯

鳳城啲食物唔差架
不過，由7:30坐到9:00至可以開始上菜

嗰一刻，我全部都覺得係美食呀

agnis b 鳥結糖

一瓶有10粒

我係因為個瓶靚至買

本身唔太鍾意食鳥結糖

但呢一隻鳥結糖另我改觀了

初時，百幾蚊買個瓶都覺得好貴

但而家覺得物有所值了。

海老

呢隻係蝦片

一片片好厚好厚嘅蝦片

佢嘅味道好似成塊面咁大嘅脆脆

基本上，唔係咁容易買到呢隻蝦片

如果見到的話，我會買定多啲存倉

世界盃期間買咗好多零食都未食

而家逐步清梗

中午掛咗1號，今晚掛3號

我希望明早返工時間掛8號

囍宴滋‧選

11-7-10 星期日

去圓方食午餐，囍宴

買一送一有菊花蜜

清甜，潤喉，消暑

胡麻日本溫室蕃茄
終於係呢間食到喇，呢間成日都買晒蕃茄架

好重芥辣味，不過都無影響胡麻的味道

蕃茄清甜，夏天必食

蒜香油麥菜
炒出黎仲翠綠呢
好味又唔油，最重要係無味精

南乳酥炸雞翼
好香南乳味，係每次必點的雞翼
外脆內軟，肉質亦軟滑

黃金蝦仁炒飯
即係鹹蛋黃炒飯，加啲鮮蝦，火腿粒，蔥，蛋塊...炒埋一碟
嘩!!!不得了，香到震呀

其實仲想點其他嘢食
但腐乳蝦已經無咗喇，好掛住腐乳蝦呀，好好食架
變咗有奇妙蝦.....
店員服務又細心，因為我有優惠卷換環保袋
唔知我係咪第一個換嘅人
見個經理係百忙之中都幫我打電話去問
間餐廳又爆場，出面等嘅食客又多人
經理都可以應付自如...
不得不在此讚一讚他們呢~~~

貼士都比多啲~~~

埋單 $265，我有V.I.P.咭

(今晚(15/7)一家人再去食過)

****************************************************************

決賽荷蘭對西班牙，賽果，0:1

可以收錢喇，哈哈哈

極之好

4-7-10 星期日

瞓醒起身十二點

嘩！！！好耐未試過瞓咁耐喇

因為睇波睇到三更半夜...

明啦~~~

要去花園街買有機泥

再唔買泥，我種唔到班蘭喇

先去極之好食個午餐先

餅餅嘅炒公仔麵

料多，炒得夠惹味，好食

我呢碗車仔麵就勁喇

米粉要另外放一碗

食飽就行去花園街買泥

行個條街，曬到熡咗

買完即刻行上去新世紀廣場涼下冷氣

買咗隻Eason演唱會嘅DVD返屋企涼住冷氣試TRIM ec睇eason

下午咕喱

2-7-10 星期五 是日放假

好喇，食飽飽餐中午飯喇

氣都未抖順，就比媽咪捉我落街市攞雞

訂咗6隻冰鮮雞，落到去
先去7-11買支葡萄適先
我同媽咪一人一支
再去雞檔，雞佬去咗食飯
咁我同媽咪無理由行返上去架嘛

媽咪話搵個地方坐下休息下先

好呀，又靈機一觸，不如去買鞋吖
又有得坐，又有得shopping
shopping能醫百病，好彩係返工時間
可以比我地係間鞋鋪不斷試鞋
我買嘢好快，因為本身個人眼角高
比我睇得上眼嘅嘢唔多

所以睇啱，試咗ok，就買喇

攪咗人地鋪頭半個鐘，只係買咗4對鞋

我同媽咪每人兩對啦

埋單千一，都唔貴，媽咪著得舒服就得啦
比完錢，填埋張V.I.P. form
又落返去街市攞雞喇
個6隻雞，真係攞到我手抽筋
無理由叫媽咪攞架嘛
咁媽咪咪攞4對鞋，我攞雞囉
返到屋企，仲要扮唔攰

睇住佢地pack行李，我就坐埋一邊

又唔可以攤係到，好慘呀...
好喇，不經不覺差不多4點喇

都係時候出發去機場喇

話咁快，半個鐘唔洗去到機場

check-in完之後，就去搵地方坐低飲杯咖啡

又咖啡?朝早飲完星巴克一大支咖啡咋

我今晚仲洗瞓嘅

飲下，食件蛋糕

好快就5點喇，送咗入閘，鬆一口氣喇

再陪兩老返屋企，今晚齊人開飯
6個人，又聚埋一齊喇
係呢兩個星期，我地6個人未試過係呢間屋一齊食過一餐飯
齊齊整整一家人，開開心心食埋中午未食晒的飯和餸和湯

個一刻，"家"的感覺又返黎喇...

早上咕哩

2-7-10 星期五 是日休息

通常唔洗返工嘅日子，我都好自由自在係屋企安排啲嘢比自己玩

但今日，我要去做咕哩

因為，親戚要走了，返去新加坡喇

十點起身之後，惡夢開始了

先行去沙漠咁遠嘅凍肉店攞螺頭...

再行返去我屋企，搵冰袋裝住啲凍肉

諗諗下，我一個人點攞呀?

靈機一觸，攞個背囊咩住佢咪得囉

之後，去茶餐廳攞燒味

你講得出嘅燒味，每樣一隻加半隻

當我睇到個一箱又一大袋燒味時

嚇到我呆咗一秒，都要攞架
慶幸，一落街就有的士
直返娘家，叫人落樓接我

個箱嘢真係唔好講笑，我都攞到手軟

以前未有買餸車時，托兩包8公斤米係等閒事

而家???手都軟埋

返到娘家第一件事，飲咖啡

再幫媽咪炒菜，半個鐘唔洗，12碟菜上晒枱

係無錯，係即席煮咗10個餸，仲有燒味兩款，一煲湯

以為惡夢完結?呢到只不過係上半場咋~~~

王家沙@又一城

1-7-10星期四

前幾日，親戚話想去離島行下

好喇，7.1.人齊，個個放假

咁我就plan好晒去長洲或者南丫島

(睇下去到中環碼頭有邊架船啦)

點知星期三，有人怕人地攰，又話唔去喇

唔去唔緊要，咁你地都要話比我知留係屋企
做蛋糕?包餃子?還是行街shopping呢?定叫外賣返屋企食呢?打麻將呢?
無人通知我，做蛋糕做到零晨一點至放我個妹走

都算喇，星期四，我都費時再理佢地喇

我就同餅餅出咗旺角翠華食早餐

有人同我個妹講 : 而家十一點幾，長洲又去唔到

包餃子又未買料，做蛋糕又趕唔切，咁而家點呀?

我個妹就咁答 : 咁去飲茶囉。

有人 : 紅字去飲茶?未等過位呀?你地而家返晒黎先再決定啦

妹妹之後打返比我，講晒比我聽

嗰一刻，我覺得佢好慘，我好委屈

返到娘家，仲屈
我講咗一大輪食店名，有介紹有咩食
有人話食餐lunch，要去到尖沙咀咁遠呀?
(尖沙咀有幾遠呀?我都未講去山頂)
咁不如食印尼，泰國嘢吖，夠近呀，九龍城
嗰個話 : 唔好食南洋嘢喇
呢個話 : 上次你帶我去食嗰間幾好食嘅呢，去嗰度食啦
(上次即係邊次呀?三年前嗰次嗰間，即係邊間呀?)
食咩架?
食嗰啲呀，你唔記得喇咩?
(即係邊啲呀??????????)
火滾，唔再問佢地，我大聲講一句
去附近王家沙食
有人：王家沙好食咩？
佢唔係我老母，真係講粗口鬧佢
另有人係我側邊準備撲火

方叔叔即興提詩

發癲咁食咗千幾蚊，餐午餐好澎湃呀)))

Trim ec

3-7-10星期六

今日收到she.com寄比我嘅trim EC café
有四種口味呢~~~

有咖啡味，可可味，蘋果綠茶味&抺香奶茶味

天氣太熱，不如就整枝雪條食下，透心涼啦

先將一包粉倒入杯中，再用少量熱水開勻啲粉

攪勻之後加少量凍水，再攪下

倒入雪條模，放入冰箱至硬，即成

四隻味整晒

無雪條梗又點呢?

一係即刻去買，一係整冰粒都得

講下各款口味先

通常呢類飲品呢，都係難飲到爆炸

因為個種代糖味真係好難頂

不過，呢隻飲品無嗰種代糖味

唔單上唔難飲，仲幾好飲 (當然有未到好好飲啦) 抺香奶茶 先講抺香奶茶，呢個幾驚喜 剪開包裝袋嘅時候，已經聞到好香嘅味道 呢種香，係吸引你去飲佢 一入口，無我討厭嘅澀味，同奶茶好匹配喎 香，滑，濃

蘋果綠茶

呢個有嗰種綠茶澀味，不過蘋果味好香好出

基本上，一入口係蘋果味先，之後就有綠茶味係你味蕾上跳下彈下

係可以接受，但我係有選擇嘅情況之下

我都係揀另一隻好了

可可味

好香朱古力味，味道亦對辦

最怕有些好假嘅朱古力味

下午茶飲一杯，即刻活力充沛

咖啡味

呢個真係不得了

入口同咖啡店買的咖啡沒兩樣

好香，好濃，沒有酸味，沒有苦味，亦不太甜

我好鍾意飲咖啡

一杯咖啡就係我早餐嘅動力

以後，要飲呢盒咖啡

又可以燒脂，正呀

 she.com夏日專輯的網址 : http://summer.she.com

更多關於此產品呢~~~