24-10-09 星期六
餅餅下午放工之後返到屋企
就同我講 : 我中咗波呀，比錢錢比你買禮物吖
好呀好呀，買禮物就要出街喇
餅餅話佢好肚餓
但我啲雲吞皮都未落格
熱返尋晚飲剩啲蕃茄薯仔湯
比餅餅頂住肚餓先
無端端餅餅同我講要去MEGA BOX
好吖，反正我都想去買嘢
不過MEGA BOX有咩嘢食呢
餅餅而家咁肚餓
咁遠路程
真係驚佢餓過龍又胃痛呀
上網摷咗一大輪
無嘢啱佢食
咁我就話 : 近近地出旺角食啦，你想食咩菜式?
餅餅要食日本嘢
簡單啦，隨手一間都得呀
味‧壽司
係花園餐廳隔離嗰間呢
即係太子始創後面個度附近啦
一入到去無人嘅?唔通落場
門口寫住照常營業
又無人迎接我地喎
我地兩個呆居居咁探頭探腦周圍望
終於餅餅好大聲講咗句唔該
有人應我地喇
仲以為呢間係啲不可一世嘅日本料理
又唔係喎，當發現我地之後
又好殷勤，洽到好處
即係唔會過份熱情或過份冷淡個隻啦
剔飲品個張黃紙同Menu有少少出入架
最好睇睇Menu先，唔好掛住睇剔剔紙呀
我地全部落柯打紙，無係迴轉帶上攞食物
所以咩色碟咩價錢唔關我地事
芒果特飲 水蜜桃特飲
好假芒果，不過餅餅話好飲 都係好假，不過假得黎都ok嘅
蟹子壽司及玉米沙律壽司
紫菜新鮮，脆脆的
唔似得元字頭嗰啲淋晒
起碼，我未試過食元字頭壽司塊紫菜係脆嘅
呢間，令我好感動
燒蟹腳捧及燒帶子壽司
燒蟹腳捧好好食，燒帶子壽司唔係咁好食
我地真係唔知點解每樣都比三件比我地
攪到餅餅剔咗3碟三文魚壽司
以為有6件，點知係9件
我又唔食魚類，幫唔到餅餅
三文魚有啲靚有啲唔靚啦
不過都係新鮮嘅
蝦壽司，無乜特別
北寄貝，好差，硬到好似食梗香口膠咁
幾難至吞到呀
唔知係咪帶子壽司貴啲
所以得兩件呢?
帶子新鮮而甜美
個人認為唔加青檸汁會好食啲
帶子好厚肉架，真係好好食呀
蟹子沙律
食極都仲有嘅蟹子，多到呢......
細細粒，脆卜卜嘅蟹子
不斷係口中爆開
芝麻八爪魚
一直同自己講小食啫
一定食得晒嘅
辣味螺肉
一般啦
金菇牛肉卷
呢個又係好好食
肉夠晒juice，汁又好好味
南瓜蕃薯天婦羅
粉槳夠晒薄，好得
鹽燒雞翼
皮脆肉嚡，下次試下釀雞翼先
我見到隔離左右落柯打
都係兩件壽司之嘛
忍唔住問侍應哥哥先
原來係6:00前落單
就有三件壽司
6:00之後，優惠完咗
就得返兩件壽司喇
因為食剩好多
侍應哥哥問我地洗唔洗打包時
我地話 : 我地要行街，唔攞住周圍行喇
侍應哥哥好好人咁話 : 可以keep住係到，等你地行完街返黎攞吖
佢嘅好意，我心領了
兩個人埋單$320
其實，可以叫少1/3就剛剛好喇
