星巴克@圓方

26-1-10 星期二

每一期東方新地我都會買

但每一期我都會隔咗好耐先會去睇

但唔知發生咩事，呢一期東方新地好快咁睇咗

隔咗一日叫快架喇

神推鬼擁之下，比我發現jacky yu係圓方開班教整湯圓喎

咁我同餅餅即刻出去圓方登記喇

仲驚會無晒位添，點知無乜人參加

仲要開兩班...

登記完之後，買外賣星巴克返屋企食食食

呢個係榛子木糠蛋糕，唔錯，不過無乜榛子味

藍梅芝士蛋糕，好好食，不過食咗一半已經好滯

咖哩牛肉芝士批

咖哩味好出，牛肉又好食，佢仲好主動幫我地叮熱佢添
好食過磨菇雞批呀~~~

仲買咗一pack咖啡味杏仁條 $ 7

total $ 83

$ 83 宵夜唔貴吖

霸王山莊

25-1-10 星期一

去完深水埗幫公司做完嘢

返屋企攞返張V.I.P.咭先

兩個大頭蝦都無帶V.I.P.咭

剩係帶個張傻惠卷

餅餅今個月生日，有霸王山莊一百蚊優惠卷

所以係有效期之前食咗佢啦

雖然來來去去都係食嗰啲嘢

但勝在水準穩定

前菜小食 : 有豆角，有粉皮，有乾豆腐絲，有肉絲

食到底至慢慢浸出麻辣味，好似每一樣嘢都各顧各咁

黃金蝦，真係好食，剩係唔洗剝殼已經得到我歡心喇
味道始終偏鹹，蝦肉夠大隻，亦好爽口

乾扁四季豆，亦係例叫，味道剛剛好，又唔會炒得過火

紅燒獅子頭麵，獅子頭浸出黎嘅酒味好強烈，酒落多了吧
不過肉質尚可，麵也彈牙

冬菇扒小棠菜，個汁甜咗少少，不過餅餅話剛剛好

所以呢，搵食市場具一定風險，而好食指數可升可跌，搵食者應自行承擔風險。

埋單$133

即係原本係$233啦

一個人的晚餐

22-1-10 星期五

娘家包咗咁多餃子

我就攞咗十幾廿隻返屋企

因為...餅餅今日又去食團年飯

所以...今日都係一個人的晚餐

攞返屋企嗰啲餃子就去煎

我想食得香口啲嘛

本地漁農美食迎春嘉年華

24-1-10 星期日

如果，唔係有廣告宣傳

如果，唔係有jacky yu

我呢，就唔會去架喇

我呢，睇報紙時，我見到有好多嘢想買架

想買珍珠蕃茄，搵極都無...........

行行下，就見到"囍宴"嘅攤位

其實jacky 對鏡頭都幾敏感，離遠一舉機
佢即刻斜眼望住我
但嗰張相唔靚，所以無post到

湯圓我就無買喇，冰格仲有兩包
買XO醬啦，唔太辣，不過好多料

之後，我當然有同JACKY 影合照啦
佢好nice架，得閒去幫襯下佢啦
再去行下個場
見到好多奇型怪狀嘅物體
我都唔知呢舊係乜
嬸嬸講咗比我聽架
不過我都係唔記得之嘛

呢到有個有山有水

呢啲一格格嘅係魚池，影完呢張相之後
我就作嘔作悶喇

離遠已經聽到咚咚喳喳聲
去觀眾席嗰邊睇下先
原來表現梗變面
哈哈，好精彩呀，睇到唔捨得走呀~~~

睇完變面，返屋企執屋咯~~~

餃子陣

21-1-10 星期四

因為前日食咗啲好難食嘅水餃之後

就好掛住自家的餃子

所以，叫媽咪爹地包餃子我食

由搓皮至剁肉，切韮菜一直至包都係一手包辦

好多人都問點解唔出面買皮呢?要自己搓咁辛苦

自己搓皮，好食好多架

有時，你一直都食梗屋企餸

覺得無咩特別，甚至有啲厭嘅時候

開始，唔去夾餸，開始唔返屋企食飯

忽然之間係街食到啲好難食嘅餸

就會開始掛住家人煮的餸

原來家人為你煮嘅餸好好食

只不過，你從來都無珍惜過......

皮包晒之後，剩返啲肉，咁媽咪就攞去包蛋餃

蛋餃係心機餸，唔係成日都食到架

當然，我返得娘家食飯

就唔只咁少餸啦......

不過，又係嗰啲蒸肉餅，菜心，薯仔雞翼......青紅蘿蔔湯

臭豆腐

19-1-10 星期二

返到屋企，係信箱收到千色店嘅宣傳單張

見到有LTS嘅精品$2起

又有我想搵好耐嘅生果盆 $ 78

咁我地諗都唔諗

即刻飛的去最近嘅大角咀千色店

行下 $10店，比餅餅搵到個開橙器喎

攞張宣傳單張出黎問下人

知唔知生果盆同埋LTS啲嘢擺係邊

原來係樓上嗰層

上到去，望下左手邊就見到喇

原來，特惠價要等到21-1-10至開始

但我身為LTS fans，我見到我心愛嘅嘢
無可能唔買架
照買囉，又唔係好貴之嘛

再行去睇個生果盆
未減價 $118，咁我地等減價先黎買喇
之後，又見到之前係roadshow賣過廣告
但一直都搵唔到嘅3D騎士
其實係一部手推車，後面拉開塊板落黎可以當櫈坐
部車都好平吖 $ 137 咋，不過個手柄位唔得
所以無買到
行返出黎搵嘢食，一直行一直行
越行就越臭，兩公婆周圍望邊到有臭豆腐呢
搵到啦，$ 7 一件，要兩件吖
因為係即炸嘅關係，所以都等咗數分鐘
一間細細間嘅店舖，門口貼咗張雜誌訪問
大大隻字寫住 : 唔識寶，過住啦!!!
我心諗，真係咁正?
其實，我地只係想過下口癮啫
都無乜期望臭豆腐會好唔好食
炸臭豆腐嗰個人，著埋西式嘅廚師服裝
終於，等到喇
噫!!!點解一袋有兩件嘅?
因為好熱嘅關係，所以攤一攤個袋口
等找錢其間，有個人想買兩件臭豆腐
廚師話 : 買晒啦，得返一件咋
兩件臭豆腐合拼埋，肯定大過一般啲臭豆腐
因為佢比一般臭豆腐細
所以，好容易咬開，四邊又夠脆
豆腐又唔知點解係滑嘅
(我未食過臭豆腐啲豆腐係滑嘅)
我失策在無留意佢間店叫咩名
我失策在無留意佢地址
不過唔怕，我識去，係九龍殯儀館附近

我下次，一定會影相

資料後補 : 臭豆腐資料

元朗林金記美食

地址 : 大角咀惠安街2號一盛大廈地下

大寒

20-1-10 星期三

媽咪係下午打比我話今日係大寒

所以提我要食糯米

之後，我係facebook post "今日係大寒，要食糯米"

嘩!!!我啲朋友+唔係我嘅朋友，再+我唔識嘅人

七嘴八舌係到討論

其中一個人 : 你咩鄉下呀?食糯米

哈~~~我真係比佢大到呀

我以為唔係食糯米呀

原來佢同我玩下啫~~~

佢話 : 梗係食羊腩煲啦

我足足笑咗成分鐘呀

兩個唔識嘅人

可以豪無芥蒂咁互寸

好過癮呀~~~

糯米一定趕唔切浸啦

叫外賣囉

6條臘腸，兩個人食，梗係食唔晒啦

行過見到有格仔餅喎
買一塊黎食下，都唔好食嘅

炸物，算把啦

大寒嘅日子天氣回暖至21-23度

仲要潮濕到好似回南天咁

想點呀???

不過熱得嗰兩日，星期三,四

之後又凍返，天氣下降得15度

想點呀~~~~

蘭芳園

17-1-10 星期日

去完六福之後

去隔離活方嘅蘭芳園飲奶茶

活方即係以前嘅 update mall

一入到去，好多人好多人，好迫好迫
不過都可以攝到兩個位比我地
張椅有個蘭字，好有心思呢~~~

黎蘭芳園梗係飲奶茶啦
一杯多奶，一杯少奶

唔知食咩好，求其叫份奶醬多
醬真係好多，不過得一塊麵包

腿蛋治，雖然唔算係滑蛋，但係都好好食呀

不過好多鑊燶

埋單$51

之後去攞相，攞"張岩"嘅相

不過好可惜，我地唔見咗地址呀

唔知點寄返啲相比佢呢?

再去數碼通訂samgung S 8000 H

再去 I Square買衫

 敗家一天完結喇

樂華餐廳

19-1-10 星期二

樂華餐廳，唔係樂華村呀

係大角咀

食完好好味嘅臭豆腐之後

一直行，都要食晚餐架

餅餅見到門口有煲仔飯

所以入去食啦

其實，平時返工已經茶餐廳

入到去真係唔知食乜
好奇怪，入邊間茶餐廳都好

我都會突然之間飽咗

但出返黎之後，又肚餓喎

有水餃上海麵，就試下啦
放心，佢係成碗滿嘅
不過我地食咗一半至記得影相啫
湯底好濃味精
麵已經浸到淋晒
餃子皮，唔係手搓都唔梗要
皮薄肉多，夠大隻
但可惜，啲肉攪到梅晒

等咗廿分鐘嘅煲仔飯上枱喇
有人，絕對唔鍾意食飯焦
如果，只係鍾意食排骨臘腸煲的話

大可以叫個煲仔菜，唔洗咁浪費吖

一黎到掀起個蓋，落豉油，再蓋蓋等5分鐘

之後可以開動喇

我無記錯好似埋單六十幾蚊

一個人的晚餐

15-1-10 星期五

飯飯今晚公司食團年飯

所以得返我一個人食飯

尋晚返娘家食飯

攞咗好多餸返黎今晚食

話時話，我都有個幾兩個月無返娘家食飯喇

飯後仲有一大碗紅豆沙

又係娘家攞返黎

食唔晒，食到好飽

飛鷹餐廳

16-1-10 星期六

朝早睇報紙時，睇到一蚊一個card reader

至知道電腦節開咗喇

沒有太大期望會買到一蚊一個card reader

不過有好大期望去敗家

去敗家之前都要醫下肚架

太耐無去過飛鷹

難得同餅餅兩個人食lunch

仲要係深水埗，真係難得加上好難得

我地坐門口死角位，唔洗搭枱，又唔太迫，我地都算好好彩

個麥包真係大過我拳頭架
超軟綿綿嘅甜甜麥包，真係望住都已經夠晒開心

一個白湯，一個紅湯
紅湯永遠都係咁多料，又好飲

凍飲細杯咗啲囉

黑椒牛柳餐，其實都係大件夾抵食啦
不過薯條份量少咗啲

黑椒西冷扒餐，同上啦

埋單$132，比$150
居然找返$ 80
我地唔會咁衰嘅

一定話返佢知啦