住家菜

21-6-10 星期一

要招呼遠道而來的親戚

又要揀一間清清淡淡嘅，又要平嘅，又要方便就腳

仲要方便我睇波嘅

我只諗到呢間，大大隻字寫住不加味精

商場內有部大電視，可以涼冷氣，坐定定睇波

又可以係上層望落去睇電視

當日係葡萄牙對北韓，賽果係7:0

我地一邊食飯，一邊聽到樓下大嗌

一大嗌，侍應哥哥先報告賽果，之後我就衝出去睇喇

場面攪笑，7:0，勁呀...

好似拉到好遠，返來呀)))

*******************************************************

先黎一煲湯，西洋菜湯，$ 45 一煲

老火湯，好甜亦好潤

欖菜肉鬆四季豆 $ 48
切到短短的豆角，有少少爽口感

蚧子黃金蝦 $ 75

好食，不過如果剝殼之後炒會更加好，稍為不方便

阿麻雞 $ 180 一隻
雖則係冰鮮雞，但雞肉鮮嫩亦無雪味
醬汁似豉油雞

鮮腐竹蝦乾浸時蔬 $ 50
未食大白菜時無問題，即係腐竹蝦乾草菇都好好食
但食到大白菜時，妹妹發現酸咗
即刻換過另一碟

鐵板蒜爆牛柳粒 $ 58
牛柳粒好腍，好惹味，唔洗用牙力咬開架

豆豉鯪魚油麥菜 $ 48
油咗少少，不過都可以接受到嘅
食到呢到菜，我發現好多餸都會落草菇架
你地睇下呢碟餸，又有草菇，仲有啲薑絲添呀

鐵板鳳陽豆腐 $ 55
呢個豆腐好食，其實應該話個汁好食
豆腐都算嫩滑嘅

條魚唔知幾多錢，不過一食入口，有朕泥味，好腥好腥
好食魚之人都話腥，不過佢地又可以照食喎
仲要食晒添喎

梅菜蒸肉餅 $ 48

呢個都好食，肉質鬆軟夠晒腍，不過食食下好似有啲唔對路
點解肉質可以腍到咁架呢?鬆肉粉???

之前咪話大白菜酸咗嘅?
之後換上一碟涼瓜炒排骨，我怕苦都可以食到喎，但都係苦

呢碗送嘅紅豆沙都唔錯架

店員服務有禮又細心
得閒又幫你換下碟
有會同你報告賽果
氣氛又好，食物又唔算太差

6個人食咗$802，食完都無口渴喎~~~

御膳飯莊 - 良朋歡聚套餐

18-6-10 星期五

係屋企研究完啲手信之後

都係時候去食飯喇

訂咗8:30，去到居然要等位，等五分鐘到啦...

一早訂咗御膳飯莊嘅良朋歡聚套餐(無魚翅架)

試埋佢啲套餐，如果連套餐都好食，賣相ok呢

可能我地....

***********************************************

一坐低，經理姐姐已經問我地飲乜

有木瓜龍脷葉茶或豆漿，我地6個人都揀木瓜龍脷葉茶

幾多錢?唔知呀，請嘅~~~

套餐冷盆 - 雞絲粉皮
粉皮稍為厚咗少少，醬汁好香麻醬味

套餐冷盆 - 疊千層峰
係豬耳，好爽口

套餐冷盆 - 四喜烤麩
每一次都會叫，口感軟綿綿，配以菇菇我至愛

套餐熱盆 - 清少河蝦仁
蝦好爽口，不過嫌佢個賣相太清，可以加啲乜加啲物又加啲咩架嘛

我妹唔知咩事，梗係要另外散叫啲嘢
叫咗一籠蒸鍋貼 & 煎鍋貼

套餐包點 - 素菜包
我唔鍾意食但並不代表佢唔好食

我鍾意食菜，但我唔鍾意剁碎啲菜

套餐熱盆 - 鮑魚菇扒生菜
普普通通，無咩特別，不過鮑魚菇好好食，我食咗兩塊呀

套餐湯羹 - 花膠乾貝三絲羹
堅持唔食魚翅，一定要魚翅至好食架咩???
花膠有益又補身，食花膠仲好啦

套餐熱盆 - 菊花松子魚
套餐的魚賣相奇差，無頭無尾，但味道依舊
魚肉仲比散叫一條有頭有尾嘅為多
奇怪奇怪，好食好食

白切雞，係預訂嘅
以為方叔叔會同瑞梅阿姨一齊黎香港
點知原來係隔一個星期之後至黎
早知唔洗訂雞住啦
新加坡啲雞唔好食，係肉質問題，係養雞時嘅問題
我又未試過，不便透露啦
初上枱時血淋淋好恐怖，之後叫廚房再攪一攪，ok喇，雞肉嫩滑

套餐麵類 - 北京炒拉麵
麵質彈牙，味道似...干燒伊麵吧

套餐熱盆 - 翠玉滿桃園
我無食過，因為一上到枱，嘩!!!油浸出黎架?我只知有小棠菜包住唔知咩去炸

片皮鴨，經我地一而再，再而三提醒之下，隻鴨嘅色靚晒
juice到爆汁，哈哈哈，好食
咁鴨骨呢?佢比多一隻我地，我地可以煲粥又可以整雪菜鴨肉絲米粉呀

送嘅腰果露
我最鍾意呢個甜品，好味，自己磨，香到不得了

套餐甜品 - 高力豆沙
唔好食，太實喇，差過以前仿膳好多

送嘅豆沙窩餅
原本我叫佢送拔絲蘋果/香蕉
但可惜廚房太忙，唔整，好，咁有性格
我下星期再去食時預訂，哼~~係呀，我下個星期五再去食呀

埋單千鬆啲，餸係食唔晒

因為，我同爹地係機場時，食咗下午茶

咁就少咗兩個大食人喇

到咗喇，到咗喇~~~

18-6-10 星期五

瑞梅阿姨終於到咗喇

三年都無見過瑞梅阿姨啦，好掛住佢呀~~~

我有plan過去新加坡架

不過，天氣係一個好大問題

之後就酒店問題，再再之後就係我地問題

出年五月又話要去英國喇

但去英國前，我又想去一轉韓國/台灣/新加坡

但我個泰國行程plan好都未出發

不過短期內我諗我都唔會去泰國住喇

因為，我聽咗餅餅嘅師姐講咗啲好驚嘅嘢

我係驚到而家自己一個人係屋企，都要開著晒所有燈囉

瑞梅阿姨問咗我地好多次要咩?我地亦都老實不客氣

要斑蘭，我要種斑蘭葉

呢個千層糕，我地唔識整喇，工序煩復到呢...
我地都係整一層之後再一層就好喇...

仲有其他手信喇，不過無影到相

方叔叔會遲一個星期到(即係今日25-6-10呀)

又有手信喇，哈哈哈

Zoe 蛋糕

17-6-10 星期四

妹妹係zoe買cake比我食

個甜笑樣，真係未食都夠冧呀

咖啡蛋糕，味道好濃，啱晒鍾意咖啡嘅人士，即係我呀)))

餅餅又出去飲酒睇波，我都費時話佢咁多
咁大個人，話得多都無面啦
今晚返黎成身酒味，不過都算清醒嘅
一入屋同我講唔見咗部電話，仲要係我送比佢嗰部i phone

我個心即刻話抵死，當然我無講出口啦

比咗反應佢之後，我同妹妹繼續食蛋糕

等i phone 4囉，我一毫子都唔會幫佢出架

自家煮

16-6-10 星期三 端午節

端午節唔食糉，想食蝦

一斤$40蚊，真係抵到無朋友，我同餅餅都唔食蝦頭

所以處理蝦時好方便，搣開個頭，連條腸都一齊扯出黎

白灼蝦，鮮甜

芽菜，我其實應該加啲火腿絲，青椒絲，總之有啲色啦
賣豆腐呢檔嘢真係無得頂，啲銀芽攞到返屋企都唔洗點搣呀
我唔可以接受頭尾有條根連住，更加唔可以接受頭或尾有啡點
我都係會搣走佢

潺菜，一斤$5，佢比咗兩斤比我，真係多到嚇死我
仲教埋我點煲，如果落魚就加舊豆腐，或者剩係滾瘦肉都得架喇

餸唔只咁少，留返第二日再煮過

我忽然之間，愛上荃灣

大家姐

16-6-10 星期三 端午節

起身之後，我就開始執屋洗被

餅餅去師傅到幫手寫符

因為妹妹，賴仔今晚開始入侵我間屋喇

瑞梅阿姨18號黎香港要住爹地媽咪屋企呀

等到餅餅點幾返黎之後

我地就飛的出荃灣食炸魚蛋

真係特登去食架

呢到啲炸物，大大件又抵食，魚肉真係好彈

豉油皇雞翼，醃得夠晒味又唔會鹹過頭

生菜魚肉湯，好好味呢...

之後再行一陣，諗住配眼鏡，但無人得閒招呼我
配唔到，下次先囉
諗住去吉之島
經過豆腐主義又入去飲咗豆漿，食豆腐花，椒鹽豆腐角
食飽行行下，見到街市諗起想食蝦
入到街市，人山人海，有無咁誇張呀?
個街市呢，好有系統架
地下賣海鮮，一樓賣牛肉/豬肉/雞肉，二樓賣蔬果/乾貨
(如果我屋企附近有一個咁嘅街市就好喇)
買埋餸，散晒，吉之島無去喇...

搭的士返屋企啦

有血有汗

14-6-10 星期一

真係唔知原來我係咁堅強

尋日買咗套陶瓷刀，堅峰利

今日用黎切粉葛，就切親手指喇

傷口都算深，血流過不停

食指指甲瘀咗，中指勁流血

當我止極都上唔血時，我開始忟憎

唔理佢，繼續切我嘅粉葛

之後，所有洗，切，醃，煮都係單手喇

因為到煮完成餐飯，至止到血呀

鹵水雞肶係買的，$14兩隻

亂棍打死牛魔王

上個星期食剩少少肥牛，今日買咗五條豆角，炒埋一碟

係街市見到草菇脹卜卜好可愛，貫多兩條辣椒炒埋一碟

就係為咗煲啖靚湯比餅餅飲....

我第一次切親手，感覺係，初時唔痛，之後痛到卜街

我又唔會打爛碗碟，咁大個人，係5,6歲嗰年打爛過一次杯

下次，我會再小心小心啲喇

泰潮

13-6-10 星期日

一心諗住去深水埗嘅添好運食點心

之後因為搵唔到，所以迫住轉軑

泰潮，望住個門口，有幅poster吸引咗我地入去

二人餐又幾抵喎，仲每一項都啱我地食呢，難得

冬瓜湯幾好飲

珍多冰，香濃椰汁味，不過唔解渴

燒豬頸肉，好腍好軟，有別一般爽口的感覺

海南雞，加5蚊可以轉雞肶或雞翼

我地無加5蚊，係因為唔記得叫加
不過都有比雞肶位比我地，好滑
雞胸都ok架，雖然唔及雞肶滑，但食得出好有雞味喎

炸蝦餅

蝦餅夠晒彈牙，外脆內彈彈彈

我地就係比馬拉盞炒椰菜苗吸引咗入黎喇

椰菜苗係餐廳比較少見，好細粒，好可愛
食落有菜嘅甜味，無苦澀味

套餐跟白飯式黃飯

埋單咪就係$158囉