第三次撳錢成功

雖然，六合彩無我份中獎

但係我今個月第二次撳錢成功呀

雖然今次少啲

但我地可以答中8條問題

呢點都值得開心喇)))

DUKE'S DELI

15-5-11 星期日

今年結婚4週年紀念日

撞啱星期日

唔洗請假可以去玩

但餅餅病咗

都唔可以去玩喇

但我誓估唔到

今日個行程咁特別囉=.=

可樂一開，有一陣好香嘅味道隨汽飄出

真係未聞過可樂原來係咁香...

Ice Latte 麻麻地，唔太好飲

雜菜蛋沙律

芝士蘑菇通粉

呢個好好食，睇佢個面咁乾

以為無乜料到

隨即叫人攞支芝士粉比我

但當我舀起時，碟底勁多芝士汁

哈哈，兩個芝士怪

呢個中文唔知叫咩...

COMBO - PHILLY CHEESE ST

等我幫佢譯作 : 芝士青椒洋蔥炒肥牛三文治

係好好食架

一份咁嘅包

我同餅餅都食唔晒

當然，如果唔食嗰個通粉

我信我會食得晒嘅

埋單 $ 274

係咪好抵呀)))

食飽飽

去Log On 血拼

之後諗住去旺角數碼通交台費

行過，都唔記得入去

直行去彩豐行

狂掃4大袋物資

返屋企放低啲嘢之後

忽然之間

兩個都比周公急call

但唔瞓得

因為仲要去超級市場買生果

順便去蛋糕店買蛋糕

經過蛋糕店

都可以直行視而不見

直入百佳

買到成車都係嘢

返到屋企，攰爆

上床瞓覺喇

瞓醒，戲肉黎喇

我地一心叫外賣壽司返黎食

點知佢話旺角店無咗

旺角區附近都不切外送

!@#$%^&*()

點呀??????????

呢個5月發生咩事呀???????????

做乜做咩都唔順架???

第二次撳錢成功

11-5-11 星期三

其實，我差不多每日都有玩

其實，我已經中過一次

其實，至有八達通日日賞開始

答中頭4條，就可以即時中$10 cash dollars

大大話話，我都有大概$200八達通日日賞架喇

之前黑到跌落地都唔識拿返柞沙

今日，好運之神終於看到了我

尋晚已經收到信

一個月之後可以去攞支票喇

係呀，你無睇錯

係一個月之後至可以攞支票呀

菜香齋

10-5-11 星期二 佛誕

佛誕梗係食齋啦

唔通作對去据扒咩

等五分鐘就有位

我兩個都好肚餓

好肚餓好肚餓

粟米羹

8人份量，因為我同餅餅每人飲咗4碗

黎呢間齋鋪最主要目的係食呢個

錦鹵雲吞

炸芋頭魚

去親齋鋪一定要叫黎食

麵醬茄子豆角

越食越唔好食

因為開始凍，槳住晒

雲耳鮮竹煲

栗米羹係個半鐘內清晒

黑色的一天

2-5-11 星期一

我真係無心插柳

揀正黑色星期五寫呢篇blog

幫媽咪去油麻地攞sogo優惠卷

我明明睇清楚封信寫住星期一開門

唔知咩事，去到人家唔開門

過對面搭車返青衣幫眼睇裝修啦

至發現無帶鎖匙

咁唯有返屋企攞條鎖匙啦

經過榕樹頭天后廟

入去裝注清香求平安喇

返屋企抖陣再出去

先去荃灣食啲嘢

去得荃灣，首選一定係大家姐啦

再去買隱形眼鏡

再返青衣

鎖匙一插入鎖匙窿再擰一擰

可以斷咗

咁點呀?心諗 : 唔係黑到咁下化???

係餅餅不斷問點解嘅時候

我係我手袋到摷到有一支眉鉗

餅餅一鉗，反而將支斷匙再推入咗

呢個時候，唔知點解佢要打電話比佢阿媽

佢阿媽就開始煩音出現

問點解會斷咗鎖匙架

餅餅 : 點撚知會斷啫，我想佢斷架

在旁的我，唯有叫佢收線整鎖仲好啦

再同佢阿媽講廢話有咩用呀?

用支眉鉗做力點

用力轉眉鉗

咁又比我地成功開到喇

入到屋，佢又打比佢阿媽

我真係啲火開始上升

打比佢有乜撚用先?

佢識整鎖還是佢識變魔術先

我唔出聲啦

我繞埋雙手望住佢同阿媽講電話

講兩句就收咗線喇

我地開始搵睇下有無螺絲批諸如此類啲嘢可以拆鎖喇

得剷泥批，就用佢黎開螺絲啦

佢老母又打電話黎

佢個仔都頂唔撚信

叫佢唔好煩住晒之後收咗線

拆咗個鎖之後

用眉鉗篤返條斷匙出黎

再裝返把鎖

不過今次用眉鉗上螺絲

黑完未?????

未呀~~~~~~

諗住係青衣城訂蛋糕

點知間蛋糕店執咗呀)))

我個無語問蒼天嘅表情

一直維持到返屋企呀)))

蛋糕的故事

8-5-11 星期日

5月4日係爹地媽咪結婚38週年

我記得，所以要訂蛋糕

先不提我訂蛋糕個part先

講我個妹訂蛋糕

星期一

打電話比妹妹叫佢去ITALIAN TOMATO訂個咖啡蛋糕

星期二去訂蛋糕

( 問題開始浮現 )咖啡味蛋糕要兩磅起

自問真係食唔晒

所以轉栗子味蛋糕

點解咁堅持咖啡味蛋糕呢?!

因為爹地媽咪都鍾意咖啡味蛋糕

得ITALIAN TOMATO咖啡味蛋糕好食

仲轉埋地方去旺角攞蛋糕

諗住星期四同爹地媽咪食飯時切蛋糕

( 再有問題出現喇 ) 點知忽然之間改星期三食宵夜buffet

唔打緊嘅，咁咪星期四返屋企切囉

其實為咗呢餐飯

日期，時間，地店，餐廳一改再改三改四改............

最後都係定咗九龍酒店宵夜buffet

一心諗住聽日可以返屋企切蛋糕

( 再黎多個問題 ) 我個妹唔知點解張單寫8號攞蛋糕

下!!!咁即係星期四都切唔到啦

咁個蛋糕咪變得毫無意義囉

攪下花臣，加呢加路

將佢變成母親節蛋糕啦

( 問題未停止過 ) 之前咪話星期四去旺角攞蛋糕嘅

而家我地返娘家切蛋糕呀

點會仲係旺角攞蛋糕架?!

阿妹唔記得轉返個地址返黎

比張單櫃檯小姐攞蛋糕時

佢話 : 唔好意思呀小姐，你個蛋糕係旺角攞架

我個妹用一種"無語問蒼天"的聲線同我講返時

我對住個電話搖頭 " 嘆息"

蛋糕終於現身喇

兩姐妹終於鬆一口氣

點樣變成媽媽節蛋糕呢

加個心型thanks mom !

再加一個嬌俏可人嘅小禮物盒蠟燭

成個母親節蛋糕咁款啦

(自欺欺人中)

祝爹地媽咪每一日都開開心心，幸福滿滿地過每一天

長洲

8-5-11 星期日 母親節

因為太平清醮嘅關係

所以入長洲買平安

我呢，係雜誌到見到有平安 i phone殼

咁...更加令我有入去嘅衝動

一落船，先醫肚

一整條街

只有一兩間海鮮餐廳開門營業

仲咩呀?準備兩日之後嘅飄色同搶包山呀?

"興樂"無開門

唯有過隔離"潮發"

一坐低

無人理我地

叫人攞餐牌

叫咗三個人

都叫我地等等

樓面人手嚴重不足

自己去攞餐牌囉...

左望望右望望

見到有張牌寫住 : 急請樓面，無須經驗

心知 : 大鑊，唔好要求咁多喇

舉手一嗌落單

即刻有個阿姐過黎

5分鐘都無

即上第一碟餸

廚房一係無單，一係過份人手充足

豉椒蟶子

爽口唔腥又唔韌

鮮味十足

份量仲好多添呀)))

蒜蓉炒白菜仔

鑊氣唔夠

我極力推介呢個燒汁雜菌牛柳

真係好食到我同餅餅都停唔到口

我原本係叫燒汁茄子牛柳嘅

但佢炒咗出黎就算喇

我時刻要提醒自己

樓面人手嚴重不足

我又唔係唔食菌

將就下囉

我未講點好味呀呵?!

牛柳入口無渣，有牛味，無比梳打粉乸到無晒味又化晒

呢點值得一讚

什菌經過煎香兩面

帶出一丁丁焦香嘅味道

嘩!!!出色，有熱誠囉

椒鹽瀨尿蝦

椒鹽味不足

蝦肉唔削，多肉，鮮甜

兩個人都比咁多份量

唔錯唔錯

遲遲都未上嘅蒜蓉蒸蝦

以為佢漏單

諗住埋單至同佢講無黎啦

記住 : 樓面人手嚴重不足，無咩事唔好舉手喇

點知說時遲那時快

出現係我面前

一睇賣相

早知叫白灼蝦啦

中蝦片開一半

見到啲腸都唔挑走佢

你唔挑，我自己挑囉

好彩鮮蝦味濃

有幾隻蒜蓉太多蓋面

冚晒啲蝦味................

全日陰陰天，又有少少風

唔太曬，幾好~~~

包山，原來呢個包山好高架

即係咁

我開始鍾意咗包山囉

嘩!!!個陣式我好鍾意呀)))))))))))))

仲有三支巨型包山

離遠望好似三支香

食海鮮點會飽架

山長水遠黎到長洲

點都要食下啲特式嘢啦，下化?!

薯塔

啲調味粉擺晒係到任你落任你溝架

一出碼頭轉右，你就會見到佢

佢好味到我先買一白一紅

食完個白 (勁香椰子味)

個紅留返比餅餅

好可惜佢話飽食唔落

問我可唔可以攞返屋企食

我話 : 可以，等陣再買過啦

我二話不說，食埋佢個紅色

嘩哈哈哈哈哈哈哈

臨上船，再買多一白一紅上船食

指定平安包餅店

有睇新聞都知

有兩間指定嘅

一間無開門

係呀，我星期日去都無開門呀

一間有開

但我想要嘅紅荳，蓮蓉，麻蓉已經賣晒喇

得返啲綠荳，香芋無人買

我地去咗唔係指定賣平安包嘅餅店買咗兩個紅荳平安包

日落黃昏

你地有無發現我無買嘢呀?

哈哈哈

以我咁嘅性格

點會唔買吖~~~~~~~~~~~

唔係指定餅店買嘅紅荳平安包

帶返娘家今晚切蛋糕時食

今日係母親節呀

我嘅平安戰利品陣

其實都唔係好多啫

紫色玫瑰花，其實佢係環保袋，十蚊咋，買返黎發花癲都好吖

紫色扇 : 又係十蚊，好襯呀

仲有平安閃燈錢箱，平安糖，平安鎖匙扣，平安口琴，平安口哨，平安繩，平安風扇，平安手枕，仲有一個我最鍾意嘅包山仔

我係第一次見到時

佢開價$169

我雖然買嘢係癲

但係我有理智架

我放低唔買

再行多幾間都唔見有得買

心諗 : 我打死都唔會用$169買個包山仔架喇

再行下行下

比我係買平安鎖匙扣同平安手枕見到包山仔

但佢無貼價錢

我同自己講 : 佢開價低過$100即買

點知佢開價$98

哈哈哈哈哈哈哈

再行多幾間都見到包山仔

都係開價$98

好彩無買貴到

所以我最鍾意係佢喇

Butter Cookies

以前細個時

過時過節，藍罐曲奇餅一定唔少得

但五種口味當中

我只愛食花花牛油曲奇

其次係圓型牛油曲奇

之後極不願意食嘅提子曲奇

仲有打死都唔會食嘅糖面嘅兩款曲奇

我成日係到諗

可唔可以只係出花花曲奇呀?

哈哈，有日行零食物語見到佢

買一盒試下先

不消10分鐘

我同餅餅消滅咗一盒

不過，佢無藍罐曲奇牛油味咁重

仲好添~~~

囍宴‧東丰

1-5-11 星期日

去太古城中心睇lego展

其實今日有好多地方想去

最後點解會去太古城呢?

多謝Jacky囉

先Shopping

唔好睇少女人

一落車見到timberland

即入去掃貨

再行上去A/X再掃

經過馬莎，唔係唔入去呀嘛

我鍾意係馬莎買嘢食

因為我鍾意馬莎啲食物有效日期短

感覺好似無防腐劑

再經過呢間個間................................

肚餓

哈哈，我地撞到圓方囍宴嘅經理呀

相認之後，感覺好親切呀

杭菊蜜及奶茶

黃金蛋黃蝦

鹹香加上金不換嘅香味

配上極大隻

每一口咬上都充滿鮮味，彈牙嘅蝦肉上

你感唔感覺到呀?

南乳炸雞翼

即係咁...外脆內軟，裡裡外外都滲透著南乳嘅香味

你仲可以點忍?

大肚婆炒飯

呢個講咗十幾萬次有幾好食架喇

即係人地問我去囍宴食咩好

我會第一時間同人講大肚婆炒飯

蒜茸炒油麥菜

餐牌好似無架~~~

經理送嘅甜品

焦糖香蕉焗布甸

Lego 展

呢張我影唔到有幾多人

但我可以講嘅係

我連隊尾都見唔到

所以我只係影咗佢

無得睇LEGO

咁點好呢?

再Shopping囉