老爺100日

星期一22/12 ,老爺剛好100日要上神位,我同餅餅前一日已買定所需物品,因為餅餅星期一請唔到全日,只可以請半日,12:30又要趕去攞神主牌,所以要買定啲物品囉,我呢就放全日,輕輕鬆鬆的在家等餅餅。豆腐花,糖不甩,我當天才買。

儀式係1:30進行,大概2:00已完了。

咁我同餅餅出去荃灣翠華食嘢,無錯,又係翠華,又係豬仔奶油包,又係魚片頭河,食飽行下千色店,無嘢買,去旺角啦,其實你知道星期二會轉冷,所以想去買 Little Twin Stars 暖手包。

呢間shop買啲精品真係好平,有多款...

26/12 Boxing day's

Boxing day's 緊係拆禮物啦,今年無乜點約人出街,所以禮物收少了~~~

"租側邊"送我的玫瑰花蛋糕模,超靚,話說呢個蛋糕模,我都搵咗半年喇,但一直搵唔到。

而家佢送咗比我,我唔洗搵喇~~~哈哈哈

餅餅送我的Little Twin Stars 公仔。

餅餅送我的日記薄,佢仲未知我有BLOG呢~~~哈哈哈

粉紅色的聖誕樹

話說係上星期二,好友'phine幫我買咗 - 粉紅色的聖誕樹 。星期四,餅餅放假,咁佢就專登入去將軍澳去幫我攞 - 粉紅色的聖誕樹 。

原來盒嘢真係好苗條,仲要好友找紙袋入住呢。

24/12平安夜之X'mas Party 2008

去party前,先去"租側邊"屋企坐一陣,我好耐無去過佢屋企喇,以前雖然唔係話日日去,但都成日上去架,有事無事都上去坐,上去食飯,因為佢屋企好熱鬧,好warm架,最緊要有個小朋友,所以好好玩架~~~

差不多8年了,"租側邊"屋企真係變咗好多,變得大咗,哈哈,係咪好神奇呢?只因為拆咗一間房,所以個廳咪大咗囉~~~

我仲係佢屋企睇有線嘅"六樓後座"睇到唔捨得走添呀,無奈~~~

去到油塘都過咗約定時間7:30了,但佢地都無打比我地喎,我地仲諗住佢地未到,哈哈,點知去到時,佢地已經到咗喇,好彩最遲唔係我地,係等期間,發現一個驚人消息,原來helen 已經到咗,吓!!!咁...

上到亞華屋企

飲飲食食

嘻嘻哈哈

玩埋亞華個細仔&大仔

仲食埋Leo整嘅唔甜但好勁薑味湯圓

仲有拾雞蛋

仲有"租側邊"整嘅勁有芝士味嘅cheese cake

都10:00喇,我同"租側邊"都趕住走,所以嗱嗱林走了。

生日篇之禮物

星期日,11點,媽咪打黎問我係咪過黎飲茶,咁我就即刻起身,同餅餅出門口喇.

去到鬼咁多人,要等幾張枱至到我地.咁我就研究個袋,因我叫妹妹個朋友係Gucci買袋有半價,個袋半價後勁平。多謝媽咪送個袋比我。

飲完茶之後,諗住走喇,返屋企擺底個靚袋之後去深水埗買電腦底版,(部電腦無端端係星期五燒咗,初時以為燒咗火牛, 點知餅餅星期六去深水埗買咗個新火牛之後,裝咗上去都係開唔到,係咁都幾大獲,因為到目前為止,都唔知係燒底版還是upc有事。)點知媽咪同爹地話要去吉 之島,問我去唔去,我呢啲做孝順女嘅,一定陪架。

行完超市,再行電器部,咁就出事喇,去到電腦部,見到啲手提電腦咁平,月供都係二百幾蚊,最貴都係月供三百幾,咁我 一句話平,媽咪即刻話買吖,跟住媽咪話:我都想要部電腦黎打機呀.我同餅餅聽到之後,呆咗一呆問返媽咪,專登買部電腦黎打機呀?打咩機呀,媽咪話總之打機 啦.我亞媽幾時變得咁潮爆架???

最後一次過買咗兩部手提電腦。

老爺守夜;出殯

昨日3/10好疲累,因為成晚瞓唔著,好早已起床,等到餅餅起身,我地落街買飯盒食,食飽,沖埋個涼就去醫院攞埋老爺遺體,攬好晒所有手續,我同餅餅返青衣坐一陣,跟住一行8人分兩架的士去九龍殯儀館。

4:00去到殯儀館坐低摺下嘢,等咗一陣堂倌黎到幫我地披麻帶孝........

儀式一直做到10:30已經好攰,媽咪爹地妹妹,仲有餅餅的家人分三架的士出去旺角發記食糖水,食完糖水後,剩返我的家人,我又未飽,所以我地去咗附近標記潮州店食小炒,價錢,食物都ok,當然又要多謝媽咪喇...

食到十一點幾,我地就各自回家了。
今日4/10又係一早起身,比昨晚瞓得好喇,起碼叫瞓得著。

等餅餅起身,我地煮麵食,係屋企坐咗一陣,沖埋涼就去殯儀館喇,去到仲差五分鐘至一點,但餅餅的家人已到齊,最誇張良哥哥已在九點鐘到了...

一連寸的儀式在三點鐘結束,奶奶已哭成淚人了,到達葵涌火葬場,見到副棺木慢慢移入去,我的眼淚終於忍唔到了,個一刻,切切實實地話比我知,老爺要永遠離開我地喇,沒有不捨,只有傷感,希望老爺早登極樂..

原本訂了4:30才到新星酒樓,但唔知點解,所有嘢都咁快攪晒,3:30已到了,又原本訂了兩圍英雄宴,因為有些親友趕回大陸,所以一圍都有多喇.好彩媽咪妹妹有黎,如果唔係半圍都得喇...

食飽後,我話比妹妹知青衣城開咗馬沙,佢呢啲shopping精點會放過吖,所以我同媽咪妹妹去行街,餅餅同佢屋企人返屋企喇,因為要解封神位,好多嘢攬...

行咗個幾鐘青衣城,平時都唔覺有咁多嘢買,可能今日媽咪比錢,所以買得特別多嘢...又要多謝媽咪啦

一齊搭地鐵去奧海城,佢地要去百佳買餸,咁我同餅餅陪埋佢地買囉,買買下,我地都買埋一份.之後我地坐順風車歸家,諗落都好笑,行路都係五分鐘,但我同餅餅都攰到行唔郁了。

做人新抱甚艱難之二

星期六出咗一篇網誌"做人新抱甚艱難",是日晚上瞓覺,餅餅個細妹打電話黎,話奶奶喊咗好耐,奶奶同細妹講我態度唔好,收線後,餅餅又話我,個一刻,餅餅即刻擰轉背瞓,其實有無人可以係我嘅角度睇返成件事?

昨日星期日,起身後餅餅都無對我黑面,我地仲一齊睇林海峰dvd,一直睇到兩點半,再睇家駒隻dvd,睇到三點半, 就出門口,出到門口等電梯,餅餅第一句就同我講,返到去.態度要好啲呀!天呀!救命呀!!!我返到去唔出聲得未呀?餅餅就話,我亞媽問你嘢你要答呀,你要 應佢,唔好黑面呀!!!好好好,心諗:無人撩起我把火,我唔會無端端點火頭架。

出去荃灣買香燭,順便去翠華食下午茶,因為我地未食飯架,食完,買完,再去斬料,搭巴士返青衣。

去到長發村,我地要去新星酒樓訂英雄宴,都算ok,價錢又唔貴$1680一圍

做人新抱甚艱難

我今日好唔開心

差不多六點鐘才到奶奶屋企,因我同餅餅都唔想好似昨晚咁要等咁耐位,所以叫奶奶落去等位,點知......

奶奶就話:我頭暈,叫亞怡(即係我)落去等啦,(啲語氣勁悔氣)(我啲火開始燃燒)

我就話:我要幫手燒衣紙喎,點去等呀

奶奶就話:得啦,我幫手燒,你去等位啦!

我就話:咁你平時又話唔識燒,

奶奶就話:得架喇

之後我無理佢,我企係到幫餅餅燒衣紙,一直到燒完,我就同奶奶講:我同餅餅落去買飯上黎食啦,奶奶即刻彈起身話:我同你地一齊落去.

我話:你又話暈,等陣暈低咁點呀

奶奶話,而家無暈喇,落去食飯啦,唔好買上黎食喇

我話:你都係唔好落喇,你留係到休息啦

奶奶無理我,入咗廁所梳頭,係呢個時候,我真係忍唔到講咗句

叫你落去等位你就話暈,而家食飯你就話唔暈

講完呢句,餅餅兇啤我,話我態度好差,咁我就話:我講錯啲咩呀?我講事實咋喎...

由奶奶係廁所出黎,落到去青衣城食飯直到食完餐飯,再送奶奶返屋企,再係屋企坐一陣至走,我都無同奶奶講過一句說 話,因為我真係好嬲,無錯,我知我態度唔好,但點解我態度唔好?一隻手掌拍不響的,佢叫我落去等位,如果奶奶唔係用近乎呼喝嘅語氣叫我落去等位,我會落 去,(我爹地媽咪叫我做嘢都未試過呢個態度)最多餅餅燒耐啲。佢不如直接同我講,唔想一個人落去,又唔想一個人係屋企,好聲好氣同我講嘢唔得架咩?要呼喝 我做嘢至顯得佢威?

又,我腦海閃出上星期奶奶突然間講出的幾句說話,當時我無放係心到,但唔知點解,無端端升起呢幾句話

第一,奶奶話:媽打(奶奶個friend's)話,娶咗新抱,乜都新抱做晒得喇,做奶奶乜都唔洗做架。當時聽完第一個反應係,你係咪想攪到我同餅餅離婚?不過老爺剛過身兩日,我唔同佢計。

第二,同日,奶奶成日話暈,我地話如果老爺出殯個日,你暈低咁點呀,奶奶居然對住我講,叫我媽咪扶住佢,我問,點解要搵我媽咪呀?我媽咪唔係你妹仔喎,佢話:你媽咪夠大隻呀,夠力扶我呀.當日,我忍住度氣,叫自己唔好嬲...一直忍一直忍......

安息吧

早上10:30 接到醫院電話,姑娘話老爺情況轉差了,叫我們即刻趕去醫院,在的士途中,姑娘一直吹我們快啲...

去到醫院,我同餅餅第一個到達,但老爺已走了。

安息吧老爺!我們愛你!

腦筋靈活

剛剛在公司發生一段小插曲

話說,有一個L君,一年只見一,兩次,所以無乜聯絡,而聯絡開個位伯伯,去了美國,也聯絡不到他,咁點算呢,因為一定要找到L君哦!!!

L君之前有留電話給我們,345X-XXXX,我們就是沒辦法打進去,當打了345後就自動切斷,那唯有摷下公司啲電話薄,電話找到了,老闆話打去響了5下,轉咗去FAX機,之後老闆就叫呆佬FAX過去喇,正等待回音之際,我又搵到L君的電話,於是我撥過輪過去喇.

今次依然係響咗5下轉咗去FAX,不過我好有心機等,等對方好心攞起電話
唔該L君吖
你係咪打錯電話呀?呢個號碼係FAX機喎

咁有無呢個人呀?

無喎

咁好啦,唔該

完結通話後,以我性格點會罷休吖,繼續搵,當時老闆已處於放棄狀態,唔理我了...

不知為何,頭腦一閃,我撥回L君寫給我們的電話,這次得咗喇,點解?因為我將345改打為354

響咗兩下有人接聽.

唔該L君吖

你邊位搵佢呀,(個刻我已認出了他的聲音了)

你係L君呀?(當時個心情好似中咗獎咁開心呀)

你等等,(老闆已經衝咗過黎)

老闆劈頭第一句問我:你打邊個電話架?咁我就係張紙,改咗354喇...

當老闆和L君講完電話後,稱讚了我一句:都係你醒目,頭腦轉得快。

沾沾自喜的我一直微笑著,直到現在。

花生眉豆雞腳湯

花生眉豆雞腳湯

材料: 花生,眉豆 各2蚊, 雞腳8隻 , 陳皮一塊

調味: 鹽

做法:

1. 雞腳先斬去腳趾甲, 洗淨後出水。

2. 花生 , 眉豆 , 陳皮 各浸半小時。

3. 將所有預備好的材料一同放凍水煲滾 , 大火煲半小時後轉小火煲一小時 ,下鹽 ,  試味 , 即成。

提示 : 要花生淋一些,可煲完後熄火蓋煲蓋15分鐘後再開火煲15分鐘,完成此程序後才可下鹽。

粉葛湯

粉葛湯

材料︰粉葛一舊 , 西施骨 , 赤小豆 , 密棗兩粒

做法:

葛去皮後切成一舊舊 , 豬骨洗淨後出水 , 赤小豆同蜜棗用清水浸半小時 ,

水滾後將所有材料一次過倒晒入煲內 , 先用大火煲半個鐘 , 改用中火煲個半至兩個鐘 , 關火後加鹽調味 , 即成。

餅餅送我的禮物之第二回

我形容唔到我昨晚有幾開心,因為我真係好開心,好興奮.

話說,我昨日寫個篇blog提及Sanrio的事,(去咗兩間都無Little Twin Stars啲嘢買)而餅餅昨晚就去咗荃灣嘅Sanrio,係我不知情之下,買咗7件Little Twin Stars物品比我,其中兩件,連目錄都無,我開心到癲咗呀,不過都係無計數機......無奈!!!

食飯枱墊

筷子一對

傘一把

食物盒一個(目錄無架)

超輕的保溫瓶(目錄無架)

杯一隻(好似都係目錄無,我唔肯定)

拖鞋一對

合家歡

無理由買咁多嘢都無入會架嘛,所以餅餅都入埋會,仲有八折添,入會禮物有:

餅餅送我的禮物

餅餅今日送咗兩份禮物比我呀,兩份都係Little Twin Stars黎架,一份係pot coaster,

另一份係 clips

好靚架,唔知點解TS啲嘢係出得少吖定Fams太多,有乜理由成間Sanrio得返兩件TS吖,拖鞋要訂,其他訂都無得訂,我好想要計數機同埋對筷子呀,我諗要去第二間搵過喇。

Little Twins Stars 的情意結

原本無乜心機寫blog,事原係上次打了一篇夢的日記,打完後,不見了,所以悶悶不樂好幾天,但係因咩事令到我又重新振作呢?答案係我由到大都好鍾意嘅 - Little Twins Stars .

我印象記得,我三歲時,爸爸媽媽送咗一隻Little Twin Stars陶瓷杯比我.當時我真係好開心,亦都好鍾意呢一隻杯,試想想一個只有三歲的小童,用的不是膠杯,而是可以打得爛嘅杯,爸爸媽媽是如此放心...

歷史未完架,當時我就諗住用隻新杯裝水飲,點知係呢個時候...(唔係打爛咗呀)爸爸衝過黎,攞起我隻杯抱起我,說: 小朋友不可以用呢啲杯架,跟住就比個奶樽比我,跟住我問,咁隻杯點呀?隻杯等你大個啲至用得囉,之後我就好乖咁,放係一個我可以成日見到佢嘅地方,日日望 住佢,放學返黎第一時間就去睇佢......

之後我地搬咗屋,唔見咗隻杯...我真係喊到九彩...一直到我五歲,忽然間有一日我係屋企玩緊嘅時候,其實係玩反轉 間屋遊戲,我搵返隻杯呀,開心到我即係洗乾淨隻杯,沖我最鍾意嘅好立克飲,我第一次用呢隻杯,至此之後,我就日日用呢隻杯,爸爸媽媽見到都無出聲,我諗佢 地已經唔記得了.除咗隻杯,我細個仲有好多 Little Twin Stars 嘅嘢架,好似木顏色啦,貼紙啦,文具啦.....等等啦.

講返隻杯,隻杯用咗大半年到啦,有一日我裝咗一杯水,由廚房行出客廳時,唔小心跣親打爛咗隻杯,嗰一刻,個杯碎晒,就連我個心都粉碎埋,我望住隻杯 好耐好耐,我決定要幫佢做一樣嘢,就係執屍,因爸爸掛住睇佢嘅心愛電視節目 - 新聞報導 , 所以唔得閒理我,我就逐塊逐塊咁執起佢,跟住又要搵掃把掃下地下,又要搵地拖拖下地下,攪完一大輪,爸爸也看完他的心愛電視節目了,爸爸話:走,我地去行 街,我地經過精品店,沒有 Little Twin Stars 杯,其他杯我都唔鍾意,算了吧,之後我任性到連水都唔飲,到而家都係,究竟係我本身唔鍾意飲水,還是因為隻杯呢?我可以好肯定話比你知,係因為一隻已逝去 的杯,而家,我每逢買了一隻Little Twin Stars杯,我都會時時攞住隻杯飲水,大概半年到啦,我就唔飲水喇,我知我問題所在,但呢個童年陰影,一世架喇!!!

點解會講起童年往事呢,因為,我昨日收到一封信,封信入面你Sanrio的小冊子,My Sanrio Summer Activity & Shopping Planner. 入面有兩大版Little Twin Stars最新嘅嘢買,有好多都係未出過架,所以今個月一定要買,唔食都要買,誓要買到破產為止(好易咋!!!)