賤物鬥窮人

去完廣華睇完醫生，時間尚早

返屋企放低啲雜物

1:00正準時向太古城中心出發

一去到太古城中心

我手上已經有一大袋戰利品喇

再行又一大袋，又再行又一大袋

如是者行呀行，買呀買，買到差不多無晒cash

就去食飯，黎到太古城

緊係要試下新開嘅"囍宴東‧丰"

見到門口掛住個牌寫住"準備中"
但門口完全無寫營業時間
咁樣貼得出黎，即係落場啦
啲侍應見到我地係門口
都唔出黎話比我地知開幾點
仲要閃閃縮縮咁避開我地視線
算啦，我地又行返去太古城中心繼續shopping
啲嘢真係好平，平到可以唔經唔覺用咗幾千蚊
我地手上一個二個三個四個五個六個.........紙袋
係太古城特別多嘢啱我地買呀
還是我地太失望呢?
我地有諗過，即刻去圓方嘅"囍宴滋‧選"
但我地實在太肚餓，所以求其食啲嘢就算喇
居然有Mos Burger，緊係食呢個啦

快啲返屋企放低啲嘢要去做gym喇
P.S: 我想講下SANRIO啲姐姐們
話說，我地攞住好多嘢入咗去 APITA 嘅 SANRIO
比我見到有我心愛嘅LTS 碗買 (一盒4隻碗)
但係太重，我唔想攞住行街
就問佢可唔可以幫我check XXX有無得賣呀 ?
係佢問緊嘅同時，我又插咀問有無 碗、筷、匙套裝呀?
佢又幫我不厭其煩咁幫我問XXX分店
佢個種出自真心幫客個種態度另我很窩心
佢無介意呢間店鋪，因為少咗我一個人的營業額
而要勞煩佢幫我問第二間零售店而黑面
其實我預咗佢會黑面 (因為我真係好煩)
但佢無黑面呀，佢仲笑容滿面同我傾計呀
所以值得一讚。

shut in the lift

今日老闆唔返工去咗打波

咁我就早些少返公司啦

我公司係舊式大廈

沒有完善的設備
亦沒有管理人員(即係看更)

我今天很不幸地困lift

架lift上到2樓，無端端停咗係到

燈亦熄了，但忽然之間著返一盞燈

那時候的我，一點恐懼都無

那我就長按alarm

同時，我亦打電話給我的同事求救

點知我同事係灣仔，仲未到公司

咁我就不停地想 : 如果我打nds，那我沒有手按alarm?

如果我聽歌，咁我未聽唔到有人黎救我?

我係架lift好似焗桑拿咁

不斷標汗，呼吸又困難

我要盡量留著空氣

所以吸氣也少少咁吸
終於有好心人大嗌 : 係咪有人困lift呀
我就好大聲咁嗌 : 係呀，救命呀
好心人無理我喎

咁我咪繼續嗌囉

嗌破喉嚨都無人應回我

那我又繼續長按alarm啦

又有好心人二號黎打救我喇

好心人二號 : 你大力啲推開lift門，就可以出黎喇

我就兩隻手按著一邊門

大力一推，門就自動開了

好彩門開了，剛好停在二樓

無驚無險

針灸

實在無辦法再忍受痛楚

記得多年前睇過一個醫師是有針灸服務

那次是因為我左手的大母指痛

痛到字都打唔到

所以去了公司附近睇醫生

當時入到去，一間藥房入面有一個老醫師

心諗 : 得唔得架?

不過經醫師一輪解釋、安慰之後

他給我很大的信心

還記得當時針灸了差不多一個鐘
之後針灸完畢，痛楚亦隨針拔去
而那次針灸經驗給我的體驗是

不可看輕中國的醫術

數年後的今天
我的右手中指及無名指又腫又痛

特別是中指，屈曲唔到，中指最接近手掌個節又紅又腫

立即去睇跌打
但好可惜，看了兩次後，只是有輕微進步
我不滿意，我的生活節奏全給因為這隻中指打亂了
立即打電話給舊同事幫我預約那位針灸醫師
今天再看見醫師，心也定了下來

望、聞、問、切做完後

就開始了針灸行動喇

插了四支針，不痛但痺

如果針下去覺得痛，代表穴位不準
如何針下去覺得痺，代表穴位準確
插完針之後，通上電源
大母指不斷的跳動
要維持35分鐘
躺在床上，睡覺吧!!!

因為用電話相機影相
有鬆郁蒙啦，不過都係給自己留個紀念喇
35分鐘很快過去
醫師幫我拔針喇
隻中指可以活動喇，但還有少許痛

但已經可以接受到

帶著大大的笑容起床

醫師說 : 妳好樂觀呀

我說 : 係呀，你令到我開心嘛
哈哈哈
比了錢後就走了
給自己一個獎勵，去買鞋吧
買了兩對鞋，很開心呢~~~
在返家途中，告知好友我隻手指好咗一半喇
好友問回我 : 要針多少次

我才醒起，我忘記問醫師何時覆診

唯有打電話問他吧~~~

張國良醫師，星期一見

覆診

尋日去咗覆診

隻手一樣包到腫晒，好恐怖呀

乜都做唔到，勁悶

好想睇小說，打機...

咁唯有不斷食嘢解悶啦

如果唔係我驚我會屈病至死啦

敷咗兩日藥結果係點呢...

感覺係有進步，但進度很慢

慢到好似蝸牛咁慢

無名指已經唔痛喇

但隻中指屈曲唔到

一屈就勁痛啦...

而家隻手指，手掌係黃色

好似浸咗黃藥水咁呀

而顯得隻手臂好白

今日，我唔再睇邱師傅喇

因為以佢咁嘅進度，我真係接受唔到喇

咁我今日會去睇咩呢???

待續

軟骨組織發炎

終於頂唔順，去咗睇跌打喇

今日痛到唔識形容

等老闆出去食完LUNCH返黎

問佢公司附近邊到有好嘅跌打醫館

老闆即刻話去睇"邱健"啦

蘇絲黃都係睇佢呀...

去到樓下，原來要上樓架

醫師好好傾，係咁同我講嘢分散注意力
等佢幫我捽時無咁痛

一路係咁傾我老闆啲嘢啦

又話上個月去馬會食飯見到佢

...講咗好多嘢喇

但佢一按落去時，真係痛到成個人彈起

我一彈起，佢就話 : 唔洗驚，無事架喇

我就話 : 我唔係驚呀，我係痛呀
問醫師 : 我係咪條筋有事呀?
醫師話 : 你係軟骨組織發炎
經過一輪又捽，又按之後
開始包紮喇
嘩!!!包紮完之後，我問佢 : 誇唔誇啲呀?

佢就話 : 唔誇，邊有人睇到啫?

咁都唔誇??????????

之後收錢，我問係咪百二呀
佢就話 : 原本百五，但你有熟人介紹百二得喇。
好吖~~~多謝

再之後我問 : 洗唔洗覆診呀?

佢話 : 緊係要啦，一次會好呀?

咁我就好無奈同佢講 : 好啦，聽日見。

冬瓜蓉

材料 : 冬瓜，一大盒史雲生清雞湯，火腿扒

做法 :

1) 冬瓜切大件，洗淨後刨成蓉

2) 火腿扒切粒

3) 煲中開大火，即倒入已刨好的冬瓜蓉，後倒入整盒史雲生，再放下火腿扒，煲滾，即成

提示 :

1) 火腿扒可以隨便放不放也可，亦可放其他，只要喜歡的材料放下就可以了。

揀飲擇食

我唔鍾意食豬肉，但我鍾意食醃制過的加工食物

午餐肉，臘腸，香腸...等等

我唔鍾意食潤腸，但我鍾意食臘腸

我唔鍾意食豬腳薑醋，但我鍾意食薑醋蛋

我唔鍾意食豬肉絲/肉粒/肉片，但我鍾意食豬扒

我唔鍾意食肉碎，但我鍾意食蒸肉餅

我唔鍾意食牛柳絲，但我鍾意食牛柳

我唔鍾意食雞柳/雞絲/雞丁，但我鍾意食雞扒

我唔鍾意食葡國雞，但我鍾意食咖哩雞

我唔鍾意食魚，但我鍾意食班(東星班，石班，老鼠班...)

我唔鍾意蒸魚，但我鍾意食煎/炸魚

我唔鍾意食鯪魚肉，但我鍾意食炸魚蛋

我唔鍾意食火腩，但我鍾意食燒肉皮

我唔鍾意食蠔，但我鍾意蠔油

我唔鍾意食芥菜，皇帝菜，但我鍾意食-大白菜,娃娃菜,白菜仔,菜干,椰菜,豆苗,菜心,菜心苗,芥蘭,油麥菜,菠菜,西蘭花,椰菜花,韮菜花,芹菜,西洋菜,莧菜,西生菜,唐生菜,通菜,芽菜,雪菜,榨菜......

我唔鍾意食青蘿蔔，但我鍾意食紅蘿蔔

我唔鍾意食炒意粉，但我鍾意食焗意粉
我唔鍾意食炒出前一丁，但我鍾意食湯嘅出前一丁
我唔鍾意食炒烏冬，但我鍾意食湯烏冬
我唔鍾意食羅漢齋，但我鍾意食齋
我唔鍾意食蝦米，但我鍾意食蝦
我唔鍾意食海鮮煲，但我鍾意食海鮮
我唔鍾意食魷魚，但我鍾意食椒鹽鮮魷
我唔鍾意食內臟，但我鍾意食牛肚
我唔鍾意食白飯，但我鍾意食炒飯
我唔鍾意食瀨粉，但我鍾意食任何麵類

生麵,粗麵,幼麵,伊麵,魚蓉麵,蝦子麵,全蛋麵,上海麵,鳥冬,粉絲,米粉,米線,意大利粉,杯麵,公仔麵,河粉,通粉......

我唔鍾意食用生果煮的餸，但我鍾意食生果
我鍾意食任何菇類
我鍾意食任何瓜類
我鍾意食任何蛋類
我鍾意食任何薯類
我鍾意食任何豆腐類

我鍾意食任何蝦蟹類

新電話

今日一返到公司，老闆已急不及待同我講，佢個大仔買咗部新電話比佢，長篇大論咁講咗廿幾分鐘之後，我就問佢攞部電話黎睇，NOKIA 6208C，無錯，係舊款機，因為賣電話嗰個人話 : 新款你用唔掂喇，所以老闆個仔買咗舊款電話喇

好喇，今日9:45坐低一刻，我就開始幫我老闆整新電話，一直到4:00，就第一步開始，已經遇到挫折，因為開來開 去都開唔到個蓋，之後老闆唔知用咩方法就推開到喇 ; 第二步就係入Sim card 喇，入黎入去都入唔到，之後我把火，連舊電都拆開，之後又入到sim card喇喎，原來電池掟住咗sim card嘅lock制啦 ; 之後第三步，就係電話簿喇，而呢個電話薄，足足攪咗成個鐘都未攪掂，原因係，老闆有三百幾個電話，而張sim card只可以入234個電話，最慘就係phone book copy to sim card又唔係順住落，我要逐個逐個睇下邊啲漏咗，之後又sim card copy to phone book，呢一part，真係玩咗好耐好耐，報紙都未睇呀，之後比返老闆叫佢自己攪返啦。

到食完lunch之後，就攪相機功能喇，我S.E320萬像素，老闆部NOKIA又係320像素，點解好差咁遠，NOKIA影出黎，唔清，唔靚，唔sharp...啦，同我部S.E.比，真係唔知點比，我部S.E.最起碼清吖，唔清咁點影相呀?

攪到4:00，終於全部攪完喇，執完佢部電話，寫埋呢篇BLOG，我而家可以放工喇。

今日返工係攪新電話。