花生眉豆瑤柱冬菇雞腳湯

材料 : 雞腳十幾隻，西施骨一斤，花生眉豆3蚊，乾瑤柱兩粒，冬菇10隻，果皮一塊，密棗5粒

做法 :

1) 西施骨洗乾淨，用凍水汆水

2) 雞腳洗乾淨，剪腳甲，用凍水汆水

3) 冬菇，花生，果皮，乾瑤柱，密棗，全部用凍水分開浸

4) 一大煲凍水，將所有材料倒入煲內，開大火煲滾之後收細火煲兩個鐘或以上

5) 熄火，落鹽，試味，即成。

p/s: 我用盆鹽，好好味呀...

品香樓

14-9-10 星期四

呢餐係做節飯，做中秋節

妹妹唔知去邊到聽到"品香樓"好出名

我地又去試新嘢

一上到南山商場

 

就買魷魚食，5毫子一條

老闆娘勁好人，講下講下

講埋個秘制汁我聽

品香樓

前菜，小食，唔好食

品香樓最出名嘅 - 朱古力
好香，勁濃朱古力

南乳豬手
好香好香，不過我唔食

薑蔥魚雲
薑係子薑，碟餸惹味到爆炸

南乳雞翼
雞翼炸得香脆，無乜南乳味，可以蘸南乳汁

白飯6碗

碗碗滿一滿

鍋貼芝麻蝦

 

芝麻嘅香，多士嘅脆，蝦膠嘅彈

可以食到停唔到口

蝦醬魷魚通菜

避風塘茄子
唔太辣，食極都係熱辣辣，散唔到熱

口水雞
唔辣但好麻，雞亦比較嚡

菜甫煎蛋
好味

臘味炒芥蘭
估唔到未到冬天都有得食
更加估佢唔到咁好食

清蒸桂花魚
我唔食魚，但我記得醫生叫我食多啲魚
所以，我都食咗六份一

鮮枝竹浸娃娃菜

呢餐真係平到無朋友
埋單$720
餸菜好味，服務態度又唔係open rice講得咁差
亞姐好商與，OK啦

不過，我地係自己寫單

寫好直接比亞姐囉

自家煮

13-9-10 星期一

好返少少就去煮飯啦

都其實抖咗成個星期囉

清清地，求其煮幾味啦

節瓜腐乳粉絲食譜

蘿蔔豬皮魚蛋食譜

蘿蔔豬皮魚蛋 - 食譜

材料 : 蘿蔔一條，豬皮5塊，魚蛋，薑，蔥，蒜

調味料 : 沙茶醬二至三湯匙

做法 :

1) 豬皮洗乾淨後切細塊，用薑蔥汆水

2) 蘿蔔削皮後滾刀切件

3) 燒一大鍋水，放入蘿蔔煮腍 (大概30-40分鐘)
4) 當蘿蔔腍後(筷子可以輕易篤入就腍喇)
放入豬皮，魚蛋及調味料
5) 兜勻之後，細火炆30分鐘至入味(記得無水要加水呀)
6) 試味，開大火收一收乾水份，上碟，即成
提示 :

1) 我今次用什錦魚蛋，有魚腐，芙蓉卷...

脫離

7-9-10 星期二

我又去咗睇醫生

尋日睇完，今日再睇

我要等到我完全好返
我至夠謄post返張相
因為每次見到張相

都好驚好驚

求求你，唔好再返黎搵我

PLEASE~~~~~~~~~~~~

醉榴香

痴孖根好味道呢......................
但點解，我唔正正經經買D 24食呢???
我等佢攤返軟
等到火都黎呀

差啲想放係微波爐丁一丁...

鮑魚

6-9-10 星期一

呢日扁桃腺發炎開始跟住我

早上睇咗醫生

夜晚都唔見好

我覺得自己好慘，好唔開心

開咗罐鮑魚食

鮑魚令我開心返少少

可惜一隻唔夠食

我下次，一定會大量入貨

用黎送禮自食必備
因為呢隻鮑魚真係好好食

我係facebook post咗呢張相後
有極大回響
我個電話未停過咁響
大概都話要過黎食飯啦
有啲又潤下我咁啦
明明個個都有facebook
點解唔係facebook應我呢?
攪到我好似做緊大生意咁
一手炒緊菜
一手揸住個電話

仲要有3個wating

無言.............................................

時新

5-9-10 星期日

原本呢，去元朗飲奶茶嘅

無錯，係專登入元朗飲奶茶

不過，因為研究太耐

都唔知應該點行

所以，打消諗頭

咁我就話去紅磡"時新"啦

"時新"個格局，係好似舊式快餐店

所賣嘅款式唔太多

主打係漢堡包

芝士漢堡包，只售$12

個塊漢堡真係好食到不得了

咬落去juicy到爆汁

炸雞肶 $ 11
即叫即炸都係等8-10分鐘左右
唔算太耐，要記住
間餐廳係FULL晒架
炸雞肶真係唔識形容比你聽點好食
熱辣辣，香噴噴，塊皮卜卜脆

炸薯條 $ 11
又係即叫即炸
一碟薯條會比兩包茄汁比你
如果唔夠再問佢攞，每包收一蚊
我呢啲茄汁怪，兩包係唔會夠架

第二round，因為唔飽
今次有雙層漢堡芝士包
其實同之前嗰個一樣
係多咗塊漢堡

呢隻係鹵水雞肶

失色咗少少，因為有得比較

下次都係食炸雞肶

飲品當然唔少得

凍檸茶，凍奶茶，每杯都係$11 蚊

不過比平常餐廳細杯

食完呢餐，夠晒精力去托書喇

*******************************

話說，我好耐無買過書

咁，我就去大眾書局買書喇

今次，我唔係買好多啫

不過有一半係漫畫

當我要搵某啲食譜書時

佢居然係無

香港書局唔係咁差下化?

真係下下要上網訂書嗎???

C.P.K.

4-9-10 星期六

星期六同餅餅去一去魯班廟拜拜先

保祐餅餅平平安安，開工大吉，搵多啲錢比我花

哈哈哈

今次拜完魯班之後

我地唔入赤柱喇

改去銅鑼灣行街街

去醫肚先

C.P.K.

因為唔係好多人

所以就入去啦

只係等飲品，已經等咗15分鐘

15分鐘之後又10分鐘
幾時至可以食呢???
食住呢啲先???

呢兩樽呆立的調味料

就好似我同餅餅一樣

等到就快枯乾

芝士煙肉意大利粉
實在，等得太久
實在，太肚餓
兩個人，三扒兩撥
KO咗碟意粉

燒蝦凱撒沙律

在我撈勻其間

有隻不受歡迎嘅小動物
即刻招來服務生
服務生立即幫我換一碟

不過要等15分鐘

因為要重新整過

大蝦芝士薄餅
每人三件，好快掃清

好喇，燒蝦凱撒沙律到了
經理不斷道歉
又減咗個沙律
仲問我地意見
食咗幾口
SORRY，碟沙律食唔落
蝦好熱，完全襯唔到個沙律
菜好苦
菜點解會苦呢?唔洗我講喇呱?!
埋單 $ 250
無計個燒蝦凱撒沙律
如果佢地可以快啲出飲品同食物
唔洗人客等咁耐
或者，我會繼續幫襯
不竟，佢地嘅服務態度

同埋某些食物都好好架

漫郵服務

今日係老爺嘅死忌

是日休息一天無返工

同餅餅一家人去拜拜老爺

....................................................

係讀書時代

好鍾意寫信

亦好鍾意交筆友

以前鍾意BEYOND(而家都係)

所以全部筆友都係BEYOND fans

每日書信來往都有十幾封

封封都幾頁紙

寫都寫到手軟

就連同學間，時不時都有書信來往

好奇怪呀呵?

日日見都寫信

因為我們都覺得

字跡可以勾起心靈一部份

所以，雖然我地日日見，日日煲電話粥

但隔數日就會寫信給對方

臨走時，講得最多嘅一句說話係 :

我/你走咗之後，你地至好拆開封信黎睇呀
講梗係一頭半個月嘅時間
每天總會想，佢地會唔會拆咗我封信睇咗架喇?
如果早一點有漫郵服務就好喇
直到出黎工作
第一份工係做廣告
嗰份唔知係唔係比人做嘅工
簡直係折磨到我不似人型
但我亦都抽空回信給朋友
筆友已經唔見晒喇
每日工作疲累回到家
見到好友給我的信
好似打了一支強心針似的
一直都有和一位朋友用書信聯繫
但近數月已經無書信來往了
好掛住她的字跡
......................................................................
某人，收到一個通知
係有關漫郵服務
呢個服務，令我想起很多很多事情
今日，我有一個幸福的"家"
有爹地媽咪老公妹妹及妹妹男朋友
那知明日明年如何
人最悲哀係唔知幾時係最後一日
(聽落好灰，但呢個係事實)
我想，如果有一天我真的走了
我走了之後，他們收到我的信
看一看字裡行間的我
他們會得到驚喜，安慰
(視乎信中內容係怨天尤人還是嬉皮笑臉啦)
咁我留下的不止是金錢，樓...等等呢啲俗不可耐的物件
而係留給他們的一點關心與問候
哈哈，如果我沒有走
咁就自己拆開黎睇
睇下一年前嘅我
同今日嘅我有什麼分別
....................................................................................................
我希望身邊的人
都開開心心，心滿意足的過每一天

....................................................................................................

係

就係因為老爺嘅死忌

令我諗起生老病死

一定會出現係我面前

無一幸免

超強暗瘡殺手

其實，我已經係一名中女

而青春痘的問題

無因為我一日老過一日的歲月裡而消失

要治理青春痘問題

潔面係好重要一環

我自問潔面及護膚做得相當全面

但，有時口痕食咗幾包薯片之後

青春痘來探我了

今次無辜辜長了一粒青春痘

是因為食咗一個星期藥

況且，餅餅長期都有青春痘的煩惱

所以，我經常搜尋一些

醫治青春痘的良方

近日，看了某雜誌的一段"編輯用後報告"

我最鍾意就係睇呢啲用後報告

從頭徹尾

我都無諗過係因為宣傳產品而欺騙人的

所以，我就去買呢個

聲稱一日就可以另青春痘凋謝的
Botani 出品的 Rescue Blemish Cream
( 草本拯救霜 )
袁彌明生活百貨
第一次去買，售貨員同我講斷貨
售貨員姐姐還說 : 要兩個星期之後至有貨返
心諗 : 唔梗要啦，青春痘睇黎都會跟我地好長時間架喇
唯有留下電話號碼
轉身，見到袁彌明在場
仲主動笑住同我打招呼
另我覺得好親切呢~~~
一個星期都無
袁彌明生活百貨嘅售貨員姐姐打電話黎話 :
貨返咗喇，你隨時過黎吖
星期六，就同餅餅去買喇
星期六夜晚，餅餅用咗一次
厚敷青春痘處
第二朝起身睇下粒青春痘
無咗，我要強調，係無咗，平咗
到咗尋晚我搽於患處
到今朝無咗粒青春痘
所以，我極力推介比大家
價錢 $ 230

所有Botani產品均是以純正及優質的有機認證成分
草本精華,純天然香料及具治療效用的植物

並以來自大自然的成分來恢復肌膚我平衡

及整體健康。

海鮮站

1-9-10 星期三

遲咗大半個月的生日飯

終於食到喇

好彩好友winnie 無咋型

選海鮮站嘅目的係因為好食，新鮮

同埋餅餅都想食

加拿大蟹

最緊要肉多膏少

 

三個人食到唔願出聲講嘢

龍蝦沙律

芒果汁好味，生果又新鮮，龍蝦肉鮮美

送嘅蒜蓉包

黃金蝦

香~~~

籠仔蒜蓉菜芯
甜~~~

芝士煙肉焗龍蝦伊麵

芝士味香濃，龍蝦彈牙，伊麵...失色咗少少

三個人居然食唔晒，痴線

埋單$900

平與貴見仁見智

我係覺得值

扁桃腺發炎之三

心情依然低落

扁桃腺"大粒龍"仍然係到

每日晨早起身刷牙唔小心掂到佢

就開始作嘔

今朝仲吞埋牙膏

............................................................

依然好肚餓

餓到個人好忟憎

平時個人因為血壓低又血糖低

會袋定包朱古力

因為唔食得熱氣嘢

所以將包朱古力抽出手袋

我仲會袋定一小包餅乾，小食

統統抽晒出黎

..........................................................

食咗藥，依然好眼瞓

係公司又瞓，搭巴士又瞓

就連搭的士都唔會放過瞓嘅機會

.............................................................

盡量唔講嘢，一講嘢就痴脷根

我講得辛苦時，人地聽得仲辛苦
...............................................................
呼吸依然 he he her her
即係唔順，唔可以太用力呼吸

氣管收縮仲大鑊

 之後咳到你嘔

扁桃腺發炎之二

依然未好，仲越黎越大粒

完全影響我吞口水

食咗藥唔見好過

個人勁攰勁眼瞓

又忽然之間勁肚餓

係餓到好似無食過嘢

今朝起身仲誇張

餓到暈暈下

即刻飲一大杯水頂住

平時中午食一份常餐已經過飽

今日食一份常餐唔夠飽仲要食埋件多士

之後再食提子乾，都唔飽

再飲一大杯水，順便食埋藥

唔夠十分鐘

個肚打鼓

好肚餓呀))))))))))))))

扁桃腺發炎

我病咗，仲要病得好慘

講出黎，大家都唔會覺得係咩大病

的而且確唔算大病

扁桃腺發炎，跟咗我都有十年喇

幾年前無返發，我以為斷咗尾

可以唔洗做手術

直到上個星期，喉嚨有啲硬物刮住條脷

照鏡，只見紅腫

一時唔為意唔理佢

一個星期後(係，硬物刮足我一個星期)

有粒濃頭慢慢出現

我至知大鑊喇

隔咗一陣再睇，有成幾粒濃集結一粒

就係咁，比人捉咗我去睇醫生

待續

味王虾片

blog 友還書時

順手送比我的禮物

哈哈哈，蝦片呀

真係鍚我架啫

多謝你呀~~~

扁桃腺發炎之四

究竟我幾時至好返呢?

我想出外食篇

但我連打都無心機打呀

我好慘慘呀

我而家最大嘅活動

就係瞓係張床睇書

同埋睇電視

我想(只係想)食奇妙炸蝦，炸魚蛋，臭豆腐，D24，月餅，godiva 朱古力

仲有卡樂B同珍珍呀

我好掛住你地呀...

心靈感應

26-8-10 星期四

經過我上星期投訴之後

意見接受，態度照舊

一出，十個餸

早上忽然之間好想飲青木瓜煲雞腳

即刻打比媽咪同佢講

夜晚，媽咪同我講 : 我地有心靈感應

你打比我時，我已經買咗青木瓜雞腳湯材料啦

哈哈哈，果然係兩母女