八面玲瓏

5-1-10 星期二

餅餅忽然之間撩我去食扒王之王又或花園餐廳

我個刻好決絕話 : 唔食

發神經，明知我講過無數次唔食呢兩間咁難食嘅食物喇

佢仲要食呢兩間，又咩好呢?

食完，我唔會飽(因為我食咗幾口就唔想食喇)

食完，因為唔飽，所以唔開心

貪平囉，大件夾抵食囉

我寧願比多一百幾十去食啲真係好嘅食物

佢仲要話我高級咗喎

頂佢個肺吖，原來有啲人

真係唔識分咩係好食，咩係唔好食

唔好食都可以放入自己個口

我無辦法可以再同佢溝通

咁佢自己再搵一間餐廳，基本上佢搵邊間我都會話"好"

八面玲瓏，曾經係send比佢其中一間食肆

曾經，都好耐喇

羅宋湯，水黎架，加豆瓣醬落羅宋湯入面，真係夠晒"誠意"

燒豬頸肉，又油，又腥，咩豬黎架?
諗住加多啲炸蒜可以蓋住啲味?
你真係當我白痴架
所以話呢，蒜頭係可以掩飾唔新鮮嘅食物

蝴蝶蝦，應該估到佢唔會比新鮮蝦比你喇呱

呢間嘢乜都有，中西泰日都有，所以叫八面玲瓏
成晚最好食係呢個，白灼娃娃菜

仲有一個什扒餐配薯菜
有司華力腸，煙肉，牛扒，雞扒，豬扒

司華力腸得半條，收我$60一個餐，要慳成咁呀?
我都係第一次見咯，可能我少出街食飯，見識少啦
至於啲扒就算喇，咁有heart嘅餐廳

啲服務好好架，不斷係你身邊行黎行去
我同餅餅講嘢，佢又會望住我地
真係好似朋友咁架，仲差未坐埋黎一齊傾囉
餅餅問我 : 黑色碟醬係咩黎架?
有個女侍應即刻裝個頭埋黎喎
但又唔出聲
之後我試下味 : 哦!蠔油囉
由七點坐到七點九埋單走人

其間計埋我地張枱得三，四張

生意之淡薄可見呢間餐廳的"誠意之作"

埋單$147，放下$150走人啦