妹記

21-11-09 星期六

同餅餅瞓醒午覺都夜晚七點喇

沖完白白之後就唔知做咩好喇

電視又無嘢睇，個肚又餓

餅餅想去旺角標記食瀨尿蝦

一聽瀨尿蝦，令我想起好記

餅餅話妹記乜都有得食

一定有瀨尿蝦食架

好啦，去"妹記"開飯啦

去到要等位，仲要好長龍

不過都係等咗大半個鐘啫

我地八點幾入座，有好多都買晒啦
起碼我地想食嘅瀨尿蝦無晒
想食椒鹽鮮魷無晒
想食通菜無晒

小食係好香好食嘅花生

我聽餅餅講咗好多次
呢到飲啤酒會比戰鬥碗比你
我終於有機會試到喇

掛住影個碗，唔記得影支淡如無味嘅"藍妹"添

欖菜肉崧炒四季豆
唔知點解我會食到魚味，好腥

椒鹽圍蝦
新鮮，好食，乾淨
剪咗蝦眼，蝦腳，感覺上已經好企理喇
椒鹽味剛剛好，唔會過鹹

生炒骨
配菜好食過主角
肉唔好食，好韌，好嚡

鬼馬油炸鬼
一上枱，嚇得我吖，咁大碟，幾好食都食唔晒啦
何況.....................

油炸鬼唔好食，釀墨魚膠一啲都唔彈牙，又無味
外脆內軟做唔到，就係食到死實
把鬼，仲話出名招牌菜添
越食越憤怒，唔食喇

脆皮炸大腸
呢個好，切晒啲肥膏，感覺上都健康啲
只剩下外皮及少少肥炸，一定脆口

成枱餸，除咗個所謂招牌菜
其他係清晒

明明我地得兩個人，唔知點解張單打7人

埋單$272，係就係好抵

不過我唔想再有下一次啦

因為好嘈

佢係地庫，又細，聲音無法走出