周記避風塘

星期四 6-8-09

下午三點幾

亞爸打電話比我話去食麻辣米線

我即刻話 : 逢星期四我都要返娘家食飯架喎，你星期四約我想死呀?不過你好彩，今晚唔洗返去食，因為聽晚妹妹生日至食飯。

亞爸話 : 咁你出唔出吖 ?

我話 : 出吖，因為亞哥有嘢比我，不過可唔可以唔食麻辣米線?好悶呀，不如去靚煲皇啦

亞爸話 :好，等我去游說亞妹

結果唔成功

我就同亞爸講 : 不如去蘭苑饎館啦

亞爸話 : 好吖，你游說下亞妹吖，我要出去做嘢喇

即刻打電話比亞哥同亞嫂先

佢地都無問題

但一直都搵唔到亞妹

直到亞妹覆電話比我

佢第一句就話 : 點解要食小菜唔食米線呀?
我話 : 食咗咁多次，試下新嘢啦，你上次又話下次出黎唔食米線就我嘅?
亞妹話 : 我唔食小菜呀
我話 : 好平咋，幾廿蚊一碟小菜，又好食
亞妹話 : 如果唔食米線我唔出喇
我即刻呆晒唔識應佢
心諗 : 點解你可以咁自私?只可以人地遷就你，你就唔可以遷就下人地?
幾秒鐘後，我至識反應

我就話 : 咁好啦，我通知返佢地食米線啦

到六點半，亞爸打電話比我，話約咗佢地7:30
我返到屋企打返電話比亞爸

我話比佢聽，我唔出喇......(我無講我同亞妹發生嘅事同感受，因為個刻，我係勁唔開心)

亦都通知咗亞哥，我叫佢比啲嘢比亞爸 (我亦無講比亞哥聽我點解唔出)
我係嬲到無出，勁唔開心，咁出得咁辛苦仲咩呢?
我話晒成件事比餅餅知
餅餅即刻話 : 我同你出去食，唔好唔開心啦
結果，去咗食周記避風塘

我地叫咗個二人餐，好吸引呀......

我地坐咗係海鮮池隔離，同佢地影好多相呀

下次黎就食你 - 瀨尿蝦

艇仔翅唔好食，可能因為我唔鍾意艇仔

材料係好多，不過我唔食嘅魷魚仲多，餅餅鍾意食，比晒佢食

避風塘炒蟹，最得我地歡心

大大隻蟹又多肉好好食，仲有啲炸蒜，空口食都正呀~~~

蒜蓉蒸蟶子皇，鮮甜，好好好食呢

金勾銀絲節瓜煲，好多薑，多到每一口都食到薑

金蒜蛋白炒飯，呢個又係好好食，飯粒炒得夠乾身，粒粒分明又唔硬，每人碗半剛剛好

精美甜品係糖水，木瓜雪耳糖水，雪耳唔靚，有朕旱味

叫多個特價$22嘅 蜂蜜蛋散，鬆化加上靚蜜糖，一人一個嫌唔夠添呀

上返去時
見到個魚池好靚
又幫佢影下相

食滿唔知幾多錢，送一張$50現金卷
下次可以用喇
仲一次過可以用兩張添
瀨尿蝦，等我呀

埋單$450，食到飽一飽

個人開心晒

不過當我再打緊呢篇blog時

又再次唔開心了

我想打電話比亞妹同佢講佢講嗰句說話好hurt我

因為我真係當佢係我朋友

呢排我係咪犯小人呢?

同朋友唔夾嘅?