點心居

27-3-10 星期六

為響應熄燈一小時(8:30-9:30)

所以我同餅餅要離開屋企

出去搵食

其實早在兩個星期前
叫餅餅搵定一間可以比我影風景嘅餐廳

搵到當日，都未搵到一間

真係火都滾呀

臨急臨忙book咗間尖沙咀海旁嘅一間餐廳

不過唔知可唔可以比到窗口位比你

最後決定唔去喇

去大角咀食點心啦

點心居

室內裝修無咩特別，最特別係有好多中式字畫

係店長推介,唔係廚師推介

阿姐話 : 五花茶我地自己煲架，好過你地飲汽水啦
咁要兩支啦
我嗰支好甜，餅餅嗰支好苦
再睇埋個有效日期
噫!!!唔同日子嘅?
作出反應時，阿姐態度好好，仲話會跟進

鵪鶉蛋燒賣
我真係見到有呢個至黎，出面好多酒樓已經食唔到喇
不過，味道討好唔到我...

山竹牛肉
山竹好大塊架，唔似得出面細細塊，鬼咁小氣
牛肉好嫩滑，無渣，無根

叉燒包
ok好食架

蝦餃
個皮好厚呀，不過蝦係新鮮嘅，亦都爽甜

鳳爪

薑蔥牛柏葉
另我諗起albert yip，味道好好，薑蔥又唔太搶

鮮蝦腸粉
真係把鬼，塊皮真係厚到無朋友
食咗半條，成碟放棄

香橙馬拉糕
好香好香橙味，入口軟綿綿，好正

流沙奶皇包
呢個真係必食呀，仲要趁熱食

搣開少少，已經流出黎
到我"卡擦"完之後，已經流咗一半出黎啦

我地兩個好鍾意食韮菜
所以見到有韮菜餅，都唔執輸喇
一黎到攤一陣之後，係咁出油
我都算喇，好食就得喇
個皮太厚，厚到真係難以形容
入面啲碎豬肉，嚡到un牙
剩返兩個，死都唔再食

鮑魚叉燒酥
sorry鮑魚唔見有，鮑魚味都無
不過，熱辣辣香噴噴嘅叉燒酥
係值得食嘅，唔好當佢有鮑魚囉

炸雲吞
我發現，逢係煎炸食物
都會成碟油，放入口時，更會成口油
唔係叫你唔好落油呀
可唔可以索返少少油至上枱呀

煎羅漢腐皮卷
好油呀

煎墨魚餅
好油囉，又唔彈牙，死實

黃金蝦春卷
呢個都油，不過油嘅程度係可以接受

兩個人食咁多嘢，一定1食唔晒啦
打包啦，不過有一半我地唔攞走喇
我唔想返去飲油

走嘅時候，同個阿姐講啲煎炸食物好油

佢即刻同廚師講

廚師好好禮貌問我意見

之後傾完就走喇

希望，個廚師真係會改進啦