林林

2009年9月17日星期四

意粉屋外賣

15-9-09 星期二

巨爵終於做到嘢喇

因之前的颱風都係一般打工仔瞓覺時候

打8號風球，甚至9號風球

雖然今次嘅風球係6:00掛

但我都早咗個半鐘放工

都叫做因颱風而放假喇

又第二日因為巨爵未走

可以瞓多個幾鐘，真係開心啫

係呀，我就係一個咁易滿足嘅人

你比少少甜頭我，我就可以樂上半天啦

五點返到屋企，一直留意風暴消息

天文台話六點前會掛8號風球

就真係5:55分掛

屋企啲糧餉唔想食

好想食意粉屋

況且意粉屋散叫外賣有85折

慳返好多架嘛

等埋餅餅返黎就出去喇

出到街，其實唔似8號風球

因為無風，我地其實幾近個海

但都感覺唔到有好大風
小食拼盆
有春卷，雞翼，洋蔥圈，豬肉腸，薯條
要數最唔好食嘅，我會選春卷
其他的，好食

田園炸雞籃
基本上我每次散叫都會叫黎食
好食過肯德基百陪以上

蒜蓉包
餅餅至愛，一定要叫

芝士火腿煙斗粉
我同佢解唔開一個情意結
我為咗佢至食意粉屋
我亦試過為咗佢呆等半個鐘
煙斗粉內滲滿濃濃芝士
每一咬開煙斗粉，濃濃嘅芝士就係你口中爆出黎
係，的確係好肥
為咗佢而肥，係值得嘅

以上的，你認為夠我地食咩?
眼闊肚窄，成日形容我地兩公婆係啱嘅
以上嘅食物，係食唔晒嘅
最好笑嘅係，煙斗粉剩返4粒，火腿兩條
哈哈，聽日每人兩粒煙斗粉，一條火腿呢~~~
其實食剩唔係好多咋
第二日，一定唔夠食呢~~~
要有一餐完美嘅結局
點可以少了甜品呢?
原本係想買星巴克嘅林明頓
見到之後又唔想食喇
過去對面東海堂
好呀，有餅餅至愛芒果
因為買三件至有盒
所以唯有夾硬買多一件
芝麻芝士蛋糕
唔好食囉

咖啡芝士蛋糕
好好食囉

芒果芝士蛋糕
唔知呢，餅餅比咗少少比我試
食唔到咩味囉，因為真係好少好少好少好少好少好少好少好少

2009年9月16日星期三

池記

13-9-09 星期日晚
要去奶奶屋企換燈

係呀，換燈都唔識，唔係白痴低能，我真係唔知咩喇

星期三燒咗燈之後，佢地寧願搵一支細電筒照明

都唔願去買燈膽換

不過算啦，人地白痴得黎有個孝順仔

唯有陪個孝順仔返去啦

好彩奶奶要返工，唔洗同佢食飯

整完之後都6:30，快啲去食飯喇

去池記係想食蟹粥
點知佢話而家無蟹粥

噢~~~早知去阿拉廚房啦

選擇唔多

豉油皇雞翼飯
唔錯吖

仲有蘿蔔墊底，蘿蔔好味呀，雞翼乾咗少少

油菜一碟要菜心

炸雲吞，幾好食吖，不過油咗少少

紅油三寶
呢個真係頂佢個肺吖，MENU有兩隻辣椒係紅油三寶隔離
咁即係辣啦，三寶絕對無問題
問題係碗紅油，紅油係好多，不過一點辣味都食唔到
我只係食到酸味，仲要唔係紅醋，係鎮江醋，真係比十個頂佢啦

南瓜蝦卷，OK啦，有南瓜極少蝦囉

吉列豬扒飯配咖哩汁
吉列豬扒好乾，無肉汁
咖哩OK，幾香濃，唔錯

你知唔知你唔好食呀吉列豬扒?

兩個人食咗$150

2009年9月15日星期二

美都餐室

星期日，13-9-09

因為14-9-09 係老爺嘅死忌

所以要去拜拜佢，上柱香，燒啲嘢比佢啦

拜拜之前都我要醫下個肚先架

所以就同餅餅去附近搵嘢食喇

美都餐室，呢排我地鍾意懷舊

就係榕樹頭，觀音廟隔離之嘛

一入去，就叫我地上上層坐

唔覺懷舊，個冷氣機好新穎添

始創1950年，有59歲喇

蓮子紅豆冰
蓮子好大粒，唔硬好淋，紅豆又係大大粒，起沙添
仲有勁香，勁濃嘅花奶
飲完呢杯嘢都飽咗一半喇，飲完之後肥死咗

凍奶茶
唔夠茶味亦唔夠奶味，都飲得出係奶茶嘅

請勿轉檯，都係第一次見

肥死咗之二有西多士
麵包中間無花生醬，亦無將練奶代替糖漿
糖漿唔太甜，應記一功
我同餅餅最鍾意就係食無花生醬無練奶嘅西多士

火腿蛋通粉
火腿係厚切，但又未到火腿扒嘅厚度
大碗到食唔晒，都唔知點解咁蠢叫兩碗

餐蛋通粉
望住都飽啦

全店最舊你呢部收銀機，唔知仲用唔用到嘅呢?
要係呢到攞完單之後，再落去比錢，好麻煩
點解唔直接開張單擺係我枱面呢?

埋單$100
下次試下錦鹵雲吞，我見幾枱都有叫
不過呢，呢間嘢價錢偏貴架
同埋無人理你囉
仲有個問題，出食物好慢咁啫

我要等到有好多時間至可以再去喇

2009年9月14日星期一

香港仔魚蛋王

食呢餐嘅日子已經係5-9-09 星期六

今日整相時發現未出，即刻補出先

因為要去佐敦裕華買椰青

但可惜去到時，人地展銷都已經做完喇

不過又比我係前幾日查到city super有喎

希望我去時，city super唔會無啦

係裕華行咗半個鐘

無理由兩手空空出黎架嘛

買返啲嘢，平衡返個心理先

我唔知呢隻係咪"亞蘇"介紹嘅杏仁豬肉紙
呢隻杏仁豬肉紙，薄到透光，好脆，好香杏仁味...

之後同餅餅去食下午茶
想去high tea嘅我
比太陽溶化成一個汗人
是但入一間有冷氣就得喇
香港仔魚蛋王，果然名不虛傳

其實來來去去都係嗰啲魚蛋魚片牛丸貢丸墨魚丸...等等等等等等等啦

我要魚蛋河
魚蛋彈牙無腥味，不過下次走芽菜
最怕食到芽菜無搣尾，唯有自己走啦
河粉唔滑

餅餅食牛肚撈麵
牛肚幾好食，夠味又唔"un"

炸雲吞
雲吞皮好重梘水味
不過因為炸得夠脆，都幾好食啦

龍鳳檸樂第一次飲
原來係咸柑桔加檸檬
等我仲一直以為係青檸加檸檬添
越飲越咸，越飲越唔解渴

2009年9月13日星期日

鳳城酒家

慶祝活動停不了，今次輪到屋企人

今次黎到鳳城酒家

點解會揀呢到呢?

只因為我要食佢嘅西米焗布丁

無錯，曾經一度傻嘅我

只係諗住食一個布丁就走了

不過好快我又正常返

不如約埋屋企人黎食啦啦啦

就係咁，約咗差不多一個月

每次回娘家都講一次

佢地終於無端端陪我癲

因為到出黎個一刻

佢地仲為咗我嘅瘋言瘋語單打我呢

瘋言瘋語咪就係只係食一個布丁囉

哈哈哈哈哈哈哈，笑到肚痛

呢個小食好酸，但又好食喎，吹佢唔脹

乳豬海蜇
妹妹要食乳豬，問服務姐姐細乳豬幾錢
服務姐姐話 : 細乳豬唔夠你地食架，你地叫例牌啦
咁例牌幾錢呀?
佢話$140
咁加埋海蜇墊底呢?
都係$140呀，你要咪幫你加囉

豆豉炒油麥菜
問佢點炒油麥菜?
服務姐姐都未答，我個腦急轉灣問 : 你有無豆豉鯪魚炒油麥菜呀?
服務姐姐答我有
黎到都無豆豉鯪魚嘅
同埋個啲都唔係豆豉囉
服務哥哥話 : 我地都無豆豉鯪魚
佢講得好鬼攪笑架

咕嚕蝦球
一上到枱，個陣酸味直上大腦，攻鼻，攻喉，攻肺
搶到要慢慢呼吸，稍為習慣了，就夾一件蝦喇
第一口咬落去時，陣酸味搶喉差啲哮喘
噫!!!咁似魚嘅?
再咬真啲，噫!!!真係魚喎
問服務姐姐寫單時，寫魚定蝦
服務姐姐話寫蝦喎
再咬多次睇下啲紋
噫!!!係蝦喎
咁點解我食第一,二次嘅時候感覺係魚呢?
唔通陣味酸到混淆咗?
問媽咪點解會咁酸嘅?
媽咪話 : 佢落咗好多白醋喇
噢!!!粉漿又太厚
平時我空口食檸檬都唔覺得酸呢，呢個no good