陶瓷班第25堂

上堂雕完花

今堂上油

再重申一次

呢個係錢甖行李喼造型

陶瓷班第24堂

9-7-11 星期六

我嗰個軟泥板做成隻碟可以攞返喇

一見到佢，我唔認得佢呀

隻色靚到吖

即係咁，我都唔太鍾意啡色

但我知道呢隻色最難攪得順滑

挑戰自己，攪咗20分鐘的努力

沒有泡泡，沒有深淺不一

至於我的硬泥板

今堂雕刻

陶瓷班第23堂 - 硬泥板

2-7-11 星期六

今堂依然係整硬泥板

整咗4個碌，有個手提位

個4個碌仲有虛線位架

陶瓷班第二十二堂 - 軟泥板上油

25-6-11 星期六

燒起咗個汽水蓋喇，哈哈哈

用砂紙磨滑佢

吉手嘅磨走佢

就係咁磨呀磨，磨呀磨，磨咗一個鐘

抺乾淨啲灰

就可以上油喇

8桶油入面，有一隻油係最難攪

我今日要會一會佢

我唔可以因為佢難攪

而要我放棄佢架嘛

點解要攪勻佢呢???

因為油下面有好多沉澱物

要攪到好勻，好似開生粉水嘅稀杰度

即係要攪勻個底就得喇

平時個啲油，攪5分鐘已經好靚

呢個...攪足我20分鐘

腰都直唔返

換黎老師一句 : 好好.........

老師仲即場睇下有無作品上呢隻色

我見佢咁雀躍，我都好開心

好似每人見我攪成呢桶油

大家都好開心

我真偽覺得自己好有成功感架

浸入去一秒之後，立即要攞起

隻油幾靚，無泡泡架...

陶瓷班第二十一堂 - 軟泥板

硬泥板依然未整好

下堂再影過

係界完硬泥板之後

等佢乾嘅時候

做軟泥板

搓泥，拍扁舊泥，用模印向泥上

之後拋泥，拋到個印變大之後

整個碟出黎

我想整個星架

耐何我功力唔夠

陶瓷班第二十堂 - 硬泥板

11-6-11 星期六

上堂比老師教訓完一大餐之後

我個小宇宙發揮無限創意

個花樽出黎效果

我好滿意

滿意程度連兩位老師都滿意

學新嘢 - 硬泥板

搓完舊泥拍扁佢，就可以開始碌呀碌

之後你要好快咁諗下你心想做啲咩

界好泥板

搵泥槳泥條封好佢

一堂做唔晒

第二堂繼續

陶瓷班第十九堂

4-6-11 星期六

休息咗兩個月

又黎上返陶瓷班喇

繼續未完成的高身花瓶

燒好出黎都兩個月喇

等我打磨好之後

就可以上色喇

老師問我想用咩油上色

我指住地下個啲

老師問 : 咁叫咩油呀?

我 : (啞咗)

老師 :( 搖搖頭 ) 高溫油呀

用咗呢隻pink beige 油入面

再用dusty blue 用海棉印出面

我個花樽有啲凹凸不平

我問老師用咩色油完出黎之後會無咁覺眼呢?

用深色好啲定淺色好啲呀?

老師就開始話我

之後就鬧我喇

咁我都係想遮住啲睱疵

洗唔洗同我講到整容咁遠呀?

最多咪似化妝

我又唔係要幫佢加啲乜僭建啲乜

原來老師眼中

呢啲係唔算睱疵

ok我明喇，明晒

陶瓷班第十八堂 泥條 - 高花樽

26-3-11 星期六

返學前

自己一個人去翠華食咗碗魚片頭河

順便去咗曲奇四重奏買咗罐曲奇比老師們

一定要今堂整好後期製作

之後攞去燒

唔知點解整極都係唔滿意

不過算啦

一日都係怪自己懶

懶於最後階段沒有好好地用木板拍回形狀

明知有啲唔夠泥

我都唔去加泥

上面個後凹晒

中間就脹卜卜

刨極都刨唔完

下面都唔知圓定方

算吧，泥條法已經學完

希望下次我唔好再偷懶

乖乖地逐個部驟做好喇

陶瓷班第十七堂 泥條 - 高花樽

19-4-11 星期六

呢堂最主要係收邊

刨呀刨，刮呀刮

將原本凸出的刮走

凹陷的補返啲泥

我就係用呢4種工具又刨又刮整咗兩個半鐘

都未整完呀

陶瓷班第十六堂 泥條 - 高花樽

12-3-11 星期六

完成喇，完成喇

個高度

之後仲要執

我都唔明點解個花樽會變成咁

好明顯，我初初整時發緊夢囉

陶瓷班第十五堂 泥條 - 高花樽

5-3-11 星期六

繼續砌高

努力砌高

越高越好

陶瓷班第十四堂 泥條 - 高花樽

26-3-11 星期六

呢堂，繼續疊高

將泥搓成條狀

之後係頂加泥條

入面刮平，出面用木拍拍個型狀

我係要做正方型的

陶瓷班第十三堂 泥條 - 蘋果型盤

19-2-11 星期六

呢個就係我溝出黎嘅顏色

原來搽厚啲

隻色就出啲

呢個係綠色加啡色再加黑色

上堂臨急抱佛腳，整個花盆底

即整即燒，今堂上埋色

今次用高溫油上色

唔洗加透明油

快靚正

成塊浸落去之後一秒攞上黎

不過之前攪呢桶油攪得好辛苦

因為呢種油有好多沉澱物

你要不停攪，攪到佢有一定嘅杰度

你就可以浸喇

我揀咗最難攪嘅matt black brown

哼!!!難我唔到嘅~~~

done!!!同我攞出去 - 燒~~~

好喇，學新嘢喇

老師問咗我好多問題

我地上次用咗搓泥條法

搓一條條泥條之後砌個盆出黎

砌完出黎之後，入面要用手指甲刮平佢

即係，入面係見唔到一條條紋

而出面係要見到一條條紋

今次呢，每一條泥條不能太幼

要粗一點，之後，繞圓圈

繞到三，四層之後，用手指甲刮平佢

出面入面都要刮

刮完之後，用木拍，拍出你想要嘅形狀

拍完之後再繞，重覆以上步驟

直至你想要的高度

• 另類藝術,
• 藝術設計

陶瓷班第十二堂 泥條 - 蘋果型盤上油

12-2-11 星期六

呢個就係我個製成品喇

呢個係花盆

係喇，唔記得做個底盤

嗱嗱聲搓泥整一個

啲油名實在太難記

由呢個post開始

每次用過啲咩油，我都會記錄

呢隻好似水彩的

並不是水彩

係underclay，上完underclay之後

就可以上透明油

透明油唔記得影相=.=

今次要油呢個

嘩!!!大制作咯

油完出黎效果我好滿意

但唔知燒完出黎嘅效果我滿唔滿意

陶瓷班第十一堂 泥條 - 花盤上油

29-1-11 星期六

上堂只係整咗呢個

燒完出黎，先用磨沙紙磨走啲粒粒

之後磨滑佢

磨順啲邊位

之後上油

呢隻油係鐵锈油

無味的，幾驚有朕血味呀

陶瓷班第十堂 泥條 - 花盤&蘋果型盤修邊

29-1-11 星期六

今次最主要整靚條邊

邊到唔靚執邊到咁啦

陶瓷班第九堂 空心 - 蘋果盒&茄子 製成品 , 泥條 - 雪人製成品

15-1-11 星期六

上完油，燒完出黎嘅效果

蘋果蓋係綠色

蘋果身係藍色

我呢個茄子真係好多災多難

先係第一次搓完出黎

寫自己個名時，唔小心篤穿

繼而唔知點解，明明兩片葉，會好似對眼咁

再而上色時，我居然揀到一桶最難攪得勻嘅啡色

當我攪好耐都攪唔勻時

我同老師講 ，老師都話呢隻色最難開

噢!!!我真係呆咗

即刻揀第二隻色

我揀咗另一隻藍色

點知呢隻藍色，攪勻之後上色

杰到呢...老師都要即刻走過黎幫我手

再而我唯有抺走某部份油

自己用掃慢慢掃

但掃油之前唔記得吹乾先

到老師幫我吹乾

我再上油，都上唔到油了

你要記住，你係一個茄子

呢個雪人仲攪笑

先係想整一個杯

唔知點解整整下，整咗個雪人出黎

燒完出黎，上油時

雪人都係上白色油好啲

下面有一大個窿比我倒回啲油我唔倒

我要係得一條罅隙慢慢泡返走啲油

兩位老師笑到我面黃

當然，我都覺得好蠢啦，哈哈哈

好喇，因為太多油

老師幫我抺走少少油

佢一攞起，頂帽跌咗落黎

嚇得老師吖

不過我又無所謂

放返上去咪得囉

不過跌爛咗一個圈

當燒完出黎之後

油會痴住的

但發現老師將我篤個3個排氣孔

放咗係側邊

做新嘢~~~

先搵個碗做模

再搓條型泥條

一個圈一個圈慢慢繞圈

繞完之後，入面用手指甲慢慢刮平佢

但又唔好刮咁深喎

如果唔係出面睇唔到條紋

我居然仲有時間去做多另一個

佢係一個蘋果型大碗

你話我繞完出黎似咩吖

唉~~~

陶瓷班第八堂 空心 - 蘋果盒&茄子 已燒 , 泥條 - 雪人 已燒

8-1-11 星期六

燒完出黎，就上油喇

今次上啲油又唔同上次上啲油

今次係一大桶油

開蓋之後要攪攪攪

攪勻成桶油之後

成個浸咗落去桶油

一秒之後攞返上黎

因為上油嘅時候

連你隻手都要浸埋落去

所以，我無機會影到相喇

下次影返上完油燒完出黎嘅效果吖

陶瓷班第七堂 泥條 - 雪人

18-12-10 星期六

我大安指意地以為

老師會燒咗蘋果同埋茄子出黎

咁今堂咪唔洗整新嘢囉...

錯晒，老師未燒.......................

上堂，老師教我整條狀物品

即係搓一條泥之後繞個型出黎

係完全無諗過整咩之下

我想求其整個圓杯就算喇

可惜，我整個圓型杯都咁難

或者，我的手指告訴我

不應這麼平凡

整到一半時

噫!!!咁似雪人個身嘅???

整埋上去啦

我覺得佢隻手好似保齡球樽呀，哈哈哈

呢邊似返隻手，哈哈哈

唔好問我點解兩邊唔對稱

咁至係藝術嘛~~~

陶瓷班第6堂 空心 - 蘋果盒&茄子 , Pinching心型杯 製成品

11-12-10 星期六

又黎陶瓷班喇...

呢件，係我第一件作品

我無諗過隻色會變成咁......

唔開心完一輪之後

我又要開始我第二件同第三件作品喇

呢個蘋果刮完又刮再刮之後再刮
刮到個蘋果薄一薄

呢個原本係茄子
當我開咗窿之後
佢居然好似一個打喊霧嘅樣

呢張係我偷影返黎
好多個啤梨呀