結婚兩週年紀念之昂平360

結婚兩週年紀念

我倆決定請假去玩

今年去昂平360

搭水晶車

由於係網上已經訂咗飛，所以去到唔洗排隊就可以攞飛喇
搭水晶車的，多一條手帶

呢個係普通纜車

呢架就係水晶車喇，呢架水晶車等咗好耐呀，起碼等咗15分鐘

沿途風景如畫

仲見到香港國際機場，一條跑道飛機起飛時，另一條跑道飛機降落
最繁忙嘅機場係香港

仲見到上年雨季時遺留下的山泥傾瀉的痕跡

經過市集，都無咩特別
到了大佛，無理由唔行上去架嘛
206級樓梯，一口氣行上去，好過踩45分鐘動感單車呀

行完樓梯，睇完大佛，拜完神，就去食飯喇

食飽飽，行去心經簡林

食埋山水豆腐花，回程了

呢個行程十分之好，唔係好曬，又好大風，好舒服

之後仲要行埋東薈城，搭車返屋企休息一下

因為仲有下場。

手信

五月十三日

老闆去完泰國返黎喇

今年無攞衫比我喇

可能佢見我唔著

所以今年唔攞比我啦

而今年改為送食物

係泰國好出名嘅"林真香"

香港未見過有豬肉條

比豬肉脆片更加好食

即係豬肉脆片捲埋就成豬肉條咁囉

好食到停唔到口啦

仲有一包豬肉鬆

我轉送咗比媽咪

因為媽咪成日幫我老闆改褲

老闆話 : 見到班師奶係咁搶豬肉條，好似唔洗錢咁

我心裡偷笑 : 咁你咪係班師奶之一

不過我口講 : 辛苦你喇，多謝晒

哈哈哈，好假，不過假都要啦，得我一個人有咋...

勞動節之shopping day

1/5/09

媽咪終於返到黎香港

可以同佢一齊行街shopping喇

越黎越似師奶嘅我

我選擇咗去家電部

其實係我屋企主人房嘅冷氣機壞咗

唔想加雪種，想換過一部新嘅

媽咪眼光好啲，所以叫媽咪幫我揀機

原先爹地幫我揀咗部日立

但個日無人理我地

可能我地著得寒酸

又或者佢地趕收工啦

所以個日無買到

我地係家電部都逗留咗半個鐘

最後揀咗開利

最緊要係快涼

買完冷氣機
吉之島送咗一張全日通九五折咭比我地
我地手持呢張咭，大買特買

仲送一張免年費嘅jusco card

買咗個細電飯煲

屋企得餅餅一個人食飯
我又唔鍾意食飯嘅
所以買一個細電飯煲

原本想買一個仲細嘅

但好可惜唔係西施煲
唔靚唔要嘅我地
揀咗呢個貴一倍嘅電飯煲
原價$438，折咗之後$416.1

售貨員姐姐話 : 新電飯煲要煲一煲水先至可以用喎

之後餅餅係玩具部見到PS3

佢當然又要買啦
不過不適用於全日通
要用原價買$3180
但要買配件喎

買多個手制三百幾

可以用全日通
仲可以加多$10蚊買多一隻games
我地揀咗頭文字D

我又去SANRIO買我心愛嘅Little Twin Stars
呢本係活頁記事薄

呢個係電風扇

仲有之前買唔到lala嘅茶杯印仔

行完家電部

再踩落去超級市場

繼續揸住張九五折全日通shopping

之後放返啲嘢返屋企

又要搭的士返我屋企放返好啲嘢
之後再去深水埗買games
因為餅餅想玩足球gaems
一隻games$300

再搭的士返娘家食飯喇

今日好攰

體力透支到我夜晚頭暈

風和日麗VS風吹雨打之赤柱之行(二)

上回講到去Wild Fire食飽飽

落到樓下

見到有兩件藝術

拍底留念先

係咪因為今年係牛年，所以有咁多牛嘅藝術品呀?

之後見到有一間好大間嘅天后廟

就入去拜拜喇

拜完之後就週圍影相
呢張係商場上面影架
係我地頭先食飯個到黎架

行完商場，影底張地圖先

在行去海邊，水清沙幼

一望無際的海，雖然日日夜夜都望到海，但呢個海好真係好靚

天色開始灰暗
我地都加速腳步去市集喇
行咗一陣
就開始落雨喇
好彩，有瓦遮頭
原來赤柱啲嘢唔啱我買架
見到有買玩具

係我兒時玩過嘅玩具黎架

不過呢個模上手好似差啲
一啲都唔滑嘅，不過都轉得幾順

行得一條市集
因為越來越多人入黎避雨
所以我都無咩心機行喇
調頭行返出去
好彩，我同餅餅都有帶伸縮傘
又有風褸
都不怕風吹雨打
之後就搭一個鐘巴士出尖沙咀喇
係巴士上面，真係好好瞓
唔經唔覺，出到尖沙咀了

lunch 喇，待續...

見證了老友的人生大事

十多年的兩位老朋友

她們是兩姐妹呢

今天她們受浸了

約同另一好友

一同前往觀看

我們準時三點正到達
一入到場，全場坐滿人
嚇了我一大跳

場很大，我地不停找位置坐下

安頓好後，受浸儀式也緊接著

首先，全體起立

一齊唱中文版的"快樂頌"

之後主持講咗好多嘢

又聽了好幾個見證

又唱咗幾首歌

快樂日，祢是彌賽亞，尋著祢的那天

好奇怪，啲歌我未聽過

但我識唱喎~~~

當中，很多哈碌的事情

笑聲不斷

做完成個過程
我地搵兩位主角影相喇
當嘉慧見到我地時
當場忍不住哭起來
令到我也措手不及
不斷安慰她
我知她很感動，很開心
我也是呀

綠豆沙

材料 : 綠豆，冰糖，臭草，水，陳皮

做法 :

1) 臭草洗淨切碎

2) 綠豆沖水後，用熱水浸半小時

3) 陳皮洗後，浸數分鐘後刮去囊

4) 大火煲水，凍水落以上材料一起煲滾後收細火煲二小時，即成。
提示 :

不喜歡臭草可不放,改海帶都可以

猴頭菇花膠湯

材料 : 猴頭菇，急凍花膠，家樂牌濃湯寶雞湯，瘦肉
做法:
1) 猴頭菇浸20分鐘

2) 急凍花膠解凍

3) 煲放三碗水，瘦肉，猴頭菇，開大火煲滾後放濃湯寶

4) 待濃湯寶溶後放花膠，大火煲5-10，花膠腍後，即成。