趕時間

25-5-10 星期二

當我要食牛扒餐時

即係我返到屋企都好夜喇

所以，我就唔會去街市買餸

夜嘅定義係，當到我屋企樓下

過咗6:30就係夜，就唔去街市喇

屋企有西蘭花，又有啲冷飯

快手烚個菜，又快手炒個西炒飯

哈哈，唔差啦，有菜有肉又有飯

尋晚煲落湯，飲唔晒，好彩都襯到牛扒

蕃茄薯仔椰菜洋蔥湯

與王子共進晚餐@天福軒

出咗呢個先，因為要post 去 OP

我真係諗到頭都爆，都唔知點幫呢間酒樓平反

2-6-10 星期三

星期二，王子係facebook話食飯

反正我星期三都係一個人的晚餐

去食飯喇~~~

天福軒，一間比我話唔會再去，但不斷去飲茶的酒樓

原因係，樂富無其他酒樓呀

不過而家唔同喇，大把食店，連UNY都開埋喇

晚飯時間，得幾枱客，仲有細半個場未開

王子隻手呀...

黃皮大老虎班

一兩$ 35，我地4個人食飯，要咗8兩
經理介紹咗幾個炒法，最後決定用西芹百合炒
黃皮大老虎班，夠新鮮
我唔食魚都食咗二件，肉質鮮嫩，唔會炒得過晒火
西芹無渣，纖維搣得夠乾淨
百合亦無一點點黑色

堂剪即燒皇子豬配蝴蝶餅 $ 90 例
經理極力推介

蝴蝶餅係絕對出色，軟綿綿，好好食

咁樣望落去幾靚架

但當夾一件出黎之後，嚇親人囉
呢件所謂嘅乳豬，蘸醬之後食好鹹，唔蘸醬食都係鹹
皮係脆嘅，但連住啲肥膏
一件起兩件止好喇

石窩燒茄子海參 $ 160

茄子經過炸完又炆之後都無變黑色，仲係令令的紫色
外觀上已經攞晒分啦
味道亦對辦，海參亦發得夠大

薑汁酒糖炒翠玉瓜 $ 45
翠玉瓜夠爽口，但又唔係腍晒
薑汁味好出，不過甜味仲出，帶埋少少酒味
呢碟瓜，一行4人都讚呀

石燒老薑鴨汁豆腐 $ 65
英文名 : Stewed beancurd with duck juice & ginger in stone pot

大家睇餸名，以為係好似紅燒豆腐咁，上面淋啲老鴨薑汁
點知黎到之後，4個人都問 : 咩黎架?係咪上錯枱呀?
一煲有雞，有魚雲嘅豆腐煲
豆腐只得數件，少得可憐
原本由主角，變成配角了

窩燒秘製羔蟹炆雞 $ 138

一打開蓋，聞到好濃烈嘅莞茜味
鮮橙色嘅蟹蓋

個汁好好味架
啲雞好多碎骨，把刀唔利換過另外一把
或者磨下佢啦

蘸這個經理送的煎米粉，一絕呀
不過唔知呢個煎米粉，係咪參考潮洲名菜"兩面黃"的煮法呢?
兩面都煎得香香脆脆的

脆皮黑毛鵝 $ 68 例

經理話即燒，要等45分鐘
等咗45分鐘出黎之後嘅結果係 : 皮脆肉嫩無佢份
我等咗45分鐘，你比啲咁嘅貨識我????
即燒???呢間酒樓真係當我地係白痴
微波爐"叮"完出黎叫即燒?你露媚吖

奉送紅豆沙

奉送生果拼盆
橙係疼咗，或者個橙比人打啦

埋單唔知幾多錢，多謝王子

但呢餐又唔係王子比錢喎~~~

樓面同廚房無溝通，經理乜叉嘢都話要問廚房

激到我差啲講粗口

我始終都係忠於我良心寫晒出黎

呢餐食完，我地係唔飽架

因為啲食物係未食晒就走咗喇

御膳飯莊

27-5-10 星期四

媽咪打電話黎問我今晚食咩?

答完之後，媽咪就話 : 樂富中心開咗間上海餐館，不如去試下咯

好呀，call齊人馬，8:00 食飯

御膳飯莊，咁似以前嘅仿膳嘅?

層叠千層峰
其實係豬耳，豬耳爽口，味道全靠醬汁，微辣，匹配

糯米蜜糖蓮藕
糯米填滿蓮藕每一個窿窿，煙煙韌韌，不過蜜糖太甜過了火

蔥油海蜇
其實都係普普通通嘅爽爽海蜇，無舍特別

花雕醉雞
花雕味好濃，雞又嫩滑，好食

部長姐姐話想送啲飲品比我地
當她作出介紹時，佢自己都講到甩甩咳咳
我都聽到一舊雲...
不過，我聽到有蜜瓜xxxxxx

我地就統稱佢做涼茶啦

呢杯涼茶熱辣辣上到枱，攤一陣至好飲呀
甜甜的，好啱夏天飲，噫!!!有冬瓜味嘅?
咁係冬瓜定蜜瓜呀?

鍋鎉豆腐
我唔知點解咁好食...係囉，豆腐嫩滑仲食得出有豆味已經算唔錯喇

砂窩雲吞雞
我地5個人，坐一張8人枱，都算好大張枱喇
居然係唔夠位擺餸...
砂鍋雲吞雞，攞埋一邊分完至上枱
一入口，我同妹妹即時嘩咗一聲
唔係好飲到嘩呀，係好鹹呀
不過媽咪話我地熱氣喎，fine，你話熱氣就熱氣啦
雞湯味濃，雲吞好大隻但味道一般

鐵板蔥爆牛肉
牛肉幾嫩，有少少梳打粉但唔重手

蒸饅頭
因為京蔥牛肉無嘢夾住黎食，所以我地額外叫咗個蒸饅頭

小籠包

一人一粒啱啱好，小籠包好多湯汁，肉鮮

鮑魚菇扒小棠菜
個芡汁好鹹，鮑魚菇好大塊

鍋貼
又係一人一件啱啱好，幾好食啦

桂花松鼠魚
個汁酸甜度剛剛好，條魚睇落好大條，食起上黎得好少肉
可能...係我地大食

炸醬麵
撈勻至記得影相，麵條幾彈，不過味道偏鹹

烤鴨
純粹係攞過黎比我地見一見隻鴨
即刻捉住個侍應哥哥，叫佢停低比我影相
隻色唔靚，唔夠深色

有個熱鍋熱住啲薄餅
唔怕變凍變硬，夠細心

薄餅有24塊，初時仲大大聲同人講邊夠我地食吖
所以至叫蒸饅頭，點知食剩10塊

一隻鴨片出黎得咁多咋
點解24塊薄餅都食唔晒呢?因為我地有啲無包薄餅食囉
得嗰少少配料，邊夠我地分呀，特別係個甜醬，少得可憐
叫部長姐姐比多碟我地
部長姐姐剎有介事話 : 唔好意思呀，呢個比多碟要收錢呀
我多口問一句 : 收幾多錢呀?
部長姐姐答 : 八蚊
笑到我地個個肚痛
$230 一隻鴨都食落肚，我地點會至在個八個大洋呢???

食飽飽，我地開始研究甜品喇
尤記得，仿膳嘅高力豆沙相當好食，軟綿綿，好好食
呢個?哼!!!相差得太遠了吧~~~

炸湯圓
食極都食唔出炸湯圓上面個點黃色醬是什麼
估咗好耐，終於我忍唔住去問人
呢個黃色醬係唔係牛油呀?
侍應哥哥答 : 係桂花糖槳
我 : 鹹架喎 ? 糖槳 ?
侍應哥哥答 : 係甜架
我呆咗兩秒，個刻我係覺得晴天霹靂，我連甜同鹹都唔識分喇?
我 : 哦!!!唔該
侍應哥哥 : 你食到係鹹架?
我 : 係呀

部長姐姐又走過黎話想送甜品比我地

腰果露
好香腰果味呢

桂花酒瓖丸子
好杰，點解會咁杰?不過都好食架

桂花杞子凍糕
部長姐姐話 : 係我地廠做架，你地食完啲咁肥膩嘅嘢，清一清味蕾舒服好多架

其實仲同部長姐姐講好多嘢，好健談架

埋單$1,150，算平喇

坐得舒服唔會迫夾，無環境無電視但有裝修

又好服務又好招呼，貼士一百幾十無手軟比出去

雖然某啲食物真係差少少

不過希望佢地會有改進

越變越好啦

一個人的晚餐 - 飯團

26-5-10 星期三

 今晚一個人的晚餐

煲咗啲飯，放啲魚鬆係中間，再包埋佢
咁就一餐喇

其實呢餐只不過餅餅9:30至放工

所以我自己食先囉......