林林

2010年3月4日星期四

與王子共進晚餐@星馬殿 - 冷熱盤篇

26-2-10 星期五

好多謝不眠王子的邀請

令我可以好開心食呢餐飯

星馬殿，一間連搭車都唔會經過嘅餐廳

但其實，距離金鐘地鐵站十分之近

未行到門口，你已經見到一間以紫色為題嘅餐廳

浪漫到呢...好似置身夢中

不眠王子問我 : 似唔似neway....

全間餐廳以紫色，白色佈置
紫色皮梳化卡位尤其舒服

白色半開放式廚房
感覺舒適，好乾淨，好企理
廚師忙碌中，不便打擾~~~

食神都黎撐場，堅呀!!!

天花嘅假天花，一個好聰明嘅概念

酒櫃，不過是晚我地無飲酒

全玻璃設計，無焗束感
視覺上更大

窗外的街燈，聞說係隔離大廈的風水燈
但我成晚望住盞燈，好光
等到夜晚11:00，熄燈之後
嘩!!!氣氛唔同晒

我地由天光坐到天黑
6:30坐到11:30，坐咗5個鐘食一餐晚飯
唔係上菜遲呀，係因為大多嘢要問經理
呢個係咩呀?個汁係咩呀?點解嘅?點整架?....
好一個天真無邪嘅少女不斷發問

女經理erica無黑面，仲笑容滿面逐一解釋
如果女經理都唔識，仲幫我地入廚房問廚師
如此體貼服務，可以去邊間餐廳搵到?

一坐低，開支水比我地先

南薑汁米茄子
大家睇到茄子表面好油呵!!!
其實一啲都唔油

米茄子有一種獨特味道
係平時食普通茄子無的
醬汁係南薑汁，有少少苦苦地，又有少少辣辣地
好一個特別醬汁

無骨鴛鴦海南雞飯
上枱時4人嘩聲四起
食物鋪排已經係視覺上享受
加上用上畫畫嘅水彩碟
即刻覺得好有藝術氣質

有姿勢都要有實際嘅
雞肉咬下一口，已經知道唔係雪藏雞
為咗確保肯定，叫經理老師過黎問一問
果然係新鮮雞
雞皮爽口，雞肉嫩滑

但我比較鍾意呢個，豉油雞
隻雞入晒味
兩款雞都唔需要再蘸任何醬汁了
雖然佢比咗三款醬汁比你

呢一碗似雞油飯，但其實，佢唔係雞油飯
佢係一碗班蘭飯
我係一個唔食飯嘅人
我都食咗幾啖

青檸檬香葉茶
每人飲咗兩杯呀
香葉滲出淡淡檸檬香，好消滯開胃
又可以清一清味蕾，等待下一道菜

水牛芝士冬菇
冬菇底釀咗芝士，趁熱食呀
如果唔係，芝士唔會流出黎架喇
芝士配冬菇又真係好夾喎

上面點綴嘅係菊花

密封優質牛肉配芥末歐芹
我簡單地叫佢作生牛肉啦
下面白色一絲絲係蘿蔔絲
我係一個好鍾意食牛嘅人
但講到生牛肉就真係...

恕我講唔出感受

班蘭雞翼
唔...無乜班蘭味
不過，我隔離嘅王子望一望我 : 咁重班蘭味都話無班蘭味?
我無出聲應佢喇
各人口味唔同，或者...我食得比較濃味呱

綠色雞翼夠晒特別
仲要係破柴雞翼，真係夠晒細心
佐酒一流

提起佐酒小食，不得不提呢個
脆炸紫蕃薯
係唔會停到口嘅小食
咬一口，香濃蕃薯味慢慢滲出
好食好食

上到枱，真係勁香，大家一齊研究係咪南瓜黎架
呢個時候，廚師都走出黎解畫喇
呢個係 : 意大利青瓜
吓!!!!!!!!!!!!
呢期當造至有架咋
上面橙色一隻隻係櫻花蝦

掀開蓋，入面釀咗豆腐同蟹肉
連青瓜皮食，一啲都唔嚡口噃
仲有少少似脆玉瓜添
個醬汁至攞你命，香到不得了
好香人參味，但無人參味咁搶
廚師又解釋喇 : 係肉骨茶 + 當歸
再一次吓聲四起............................
平時亞媽差不多要揸住雞毛掃，迫我都唔肯飲一啖嘅當歸湯水
今日一小羹一小羹慢慢地品嚐
係要用到品嚐呢個詞彙
我要帶亞媽黎食下至得喇

呢個係魚
我唔記得咩魚，只係記得無鱗魚

我無食到

蕃薯上面有超迷你椰菜

馬拉醬羊肋骨肉

我食羊會敏感，所以無食

五香清湯，每人一小碗，試下個味

帶子配釀蘿蔔
帶子鮮甜，好好食呀

喇沙醬虎蝦
一支支的係胡椒葉
蝦身結實爽口，正

呢個係因為見到隔離枱有
我地又要有，靚到吖
未上枱已經虎視眈眈

南薑汁赤貝
呢粒係洋蔥仔
赤貝爽口鮮甜

個汁有少少辛辣味，南薑味好出

首尾首呼應，第一道菜嘅南薑味無咁出
可能係因為經過長時間烹調
所以，南薑味已揮發

反之，呢個係冷盤

南薑味還保存著

所以有少許辛辣

明天繼續星馬殿甜品篇

我唔想要一個咁嘅奶奶

28-2-10 星期日

正月十五，餅餅逢初一，十五

都會返屋企燒下衣紙，執下神位

我呢...如果佢亞媽係到，一定唔會陪佢嘅

餅餅其實已經plan好話燒完衣紙

就返過黎同我一齊去長洲喇

係餅餅梳洗完畢，佢忽然之間問我

陪唔陪佢返去

我諗咗好耐，陪啦

反正之後要去長洲，咁唔洗餅餅滕黎滕去都好嘅

但當時天真嘅我，無諗過見佢亞媽十幾分鐘

都會有事發生...

係出門口前，佢亞媽叫佢個仔買啲生果擺係神位

好啦，去到青衣城，入去百佳買生果買嘢飲買少少嘢食啦

話晒十一點幾，乜都未食嘛

上到去，餅餅已經好醒目

嘢都唔食，盡快執好神位

咁佢亞媽食梗飯，我又買咗少少齋

一齊食都好正常啦

呢一part食飯係無事嘅

食食下，餅餅叫我幫手搣開貼住係橙嗰啲貼紙

佢亞媽忽然彈一句 : 唔洗換生果喇，已經換咗架喇

佢個仔話 : 咁你又叫我買(勁悔氣)

當我食完喇，餅餅都執完神位
咁我就快手快腳去摺衣紙
總共4份，好多嘢整
佢亞媽無端端同我講 : 話呢隻朱古力好好食架，你試下吖
好呀，(大家客客氣氣咪得囉)
咁我仲未摺完衣紙，諗住摺完衣紙至食粒朱古力啦
佢亞媽開始忽上條筋喇
無端端攞個細密實袋，裝晒啲朱古力
又裝啲日本餅(即係個盒好大，好靚嗰啲，但唔好食嗰啲餅)係個細密實袋
叫我攞走
我話 : 唔要呀，我等陣入長洲唔攞喇
佢仲要話 : 攞啦，擺係個袋到之嘛
我話 : 啲朱古力會溶架，整污穢我個袋架
佢話 : 有密實袋唔怕啦
之後我好大聲講咗一句唔要呀
佢亦都無出聲喇
我摺好晒嘢，去洗手喇
之後，佢就係梳化摷嘢，我都唔知佢摷乜
張梳化得我同餅餅嘅外套，一部大相機同我個袋
我無理佢喇，佢屋企，唔通問佢摷乜嘢咩
之後，佢攞起我個袋問個袋係邊個
我話我架，我明明見佢放底咗架
前後都無三秒
我見佢打開我個袋，已經拉開拉鍊，裝梗我個袋
我即係好大聲話 : 你有無攪錯呀，開我個袋

佢仲要揸住包朱古力話要放入去

我即刻又好大聲話 : 唔要呀
餅餅同時亦好大聲話唔要呀，仲鬧佢亞媽咁多事
嗰刻真係嬲到我爆炸，我真係想即刻摑佢一巴
咁撚無禮貌，咁唔識尊重人嘅行為都做得出
當然，以上行為同說話我都無做到
我係一個有家教，有教養嘅人
我忍，我攬住我個袋死忍爛忍
心中再一次肯定，以後一年見一次都嫌多呀

忍無可忍，搵餅餅出氣

餅餅見我開始向佢發脾氣

即刻話走喇，連個麵包都唔食喇

我真係無辦法再頂得順佢喇

可唔可以唔好再見佢

我真係以後永遠都唔想見到佢呀~~~

2010年3月2日星期二

譚魚頭

因為唔知點解YAHOO要剷咗我兩篇BLOG

所以，我而家要補返出黎

19-2-10 星期五

氣溫只有10度

著住大褸，攬埋頸巾，著晒底衫

依然凍到抽筋，對腳不斷打震

牙關亦打震，不斷發出聲響

咁凍天氣，今日唔食韓餐喇

打邊爐啦

其實係睇咗忽然一週嘅飲食男女

見到譚魚頭有抽獎，所以我至揀呢間咋

牛魔王海鮮盒

見到啲嘢都啱我地食，就叫一個啦

餅餅見到有點心，仲以為係一籠籠點心呢

呢碟係前菜，可有可無啦

餅餅唔食辣，如果唔係叫麻辣

蕃茄湯底...OK啦
不過，我覺得我整嗰個蕃茄湯底好食啲

竹蔗水一渣，唔會過甜又或死甜

解到喝，清清地唔錯，好好飲

呢碗配料，每人一碗

有 : 莞茜，蔥，花生，指天椒，乾蔥，蒜

叫佢比碟豉油，死都唔肯比

叫我地係碗嘢加啲湯就得
餅餅唔食莞茜又唔食辣
我又唔食蒜，咁點呀???

最後，叫完一次唔比，再叫都係唔比

仲用好奇怪嘅眼光望住我地

真係唔明要豉油有咩咁怪呢?

隔離枱要豉油都唔比

我地兩枱一齊再叫，終於都肯比喇

我應該影低碟豉油

呢個就係牛魔王海鮮盒喇

其實，兩個人食都好豐富喇

個大魚頭真係另到我好驚呀!!!

我以後都唔再食珊瑚蚌同桂花蚌架喇

牛都有幾款 : 有美國肥牛，本地牛肉，牛腱，極品和牛

唸個就係點心喇
原來係用黎打邊爐嘅~~~
不得不讚，好食過一籠籠的點心呢
有 : 小籠包，叉燒包，奶黃包同蝦餃
蝦餃個皮比較厚啲
奶黃包有奶黃味
小籠包一般
叉燒包最好食

因為，唔食乜蚌物蚌，又唔食魚

所以叫多幾碟食物

花膠
雖然，碌極都唔溶
但係好嚡，嚡嘅程度係
我未食過花膠係嚡嘅
即係好似食梗擦子膠咁...
$ 68 當跌咗算啦

炸芋頭
我同餅餅都好鍾意食炸芋頭
芋頭有分粉同山水，比較重身嘅係山水
我一食山水芋頭就會敏感
對上嗰次食咗山水芋頭，住咗兩日醫院
我記得係食芋頭西米露，食咗兩碗
今次，成碟得一件係山水 (我唔知餅餅有無食過山水啦)
食咗一啖，吞咗之後
噫!!!山水黎嘅?
仲剩半件即刻放低喇
都未返到屋企，個咀已經腫咗麻痺咗
新年流流唔去醫院啦
返到屋企，博晒命飲水
隔咗兩日，好返喇