個嚇一跳嘅電話
係餅餅細妹打黎
內容係奶奶入咗院
而家白車送梗去瑪嘉烈
我地係銅鑼灣
一時三刻點可以去到荔景呢
返正白車到咗我地都唔知可以做啲咩啦
咁我就同餅餅講 : 唔洗擔心，你亞媽肯定又係暈啫而餅餅亦都好肯定話係啦
其實，我真係一啲都唔擔心
唔係因為佢係我奶奶所以唔擔心
而係，心地好嘅人永遠都係短命啲所以佢唔會有生命危險，明啦?
我地仲慢條斯理搭巴士出九龍再轉的士
去到見到細妹
佢仲話奶奶未到
佢亞哥，即係我老公餅餅
一齊企係出面等白車到喎我真係見到佢地兩兄妹就眼火爆
我即刻鬧餅餅 : 你去登記處問下啦
個妹繼續打電話比唔知邊個
我就坐係到帶口罩
問完之後，原來已經到咗好耐
我唔知細妹點問嘢
又或者有無問到
我唔知如果我唔出聲
佢地兩兄妹會唔會等到天黑?
有腦都識諗下啦
我地由銅鑼灣搭巴士再搭的士都已經到咗
有乜理由機場出黎坐白車嗰個未到呢???
我第一句就問 : 係咪無事喇，走得未
個醫生答我 : 你地唔洗咁緊張，佢無事，中暑啫，你地出去等啦
我老早知佢無事啦
等呀等...佢兩兄妹不斷出出入入
懶係緊張咁，我睇住佢地好似行catwalk咁
當醫院係自己屋企，超攪笑囉
之後餅餅個大妹都到咗喇我帶住口罩，可能佢唔認得我
我亦唔想叫佢
一個咁無禮貌嘅人
我都費時同佢講多句嘢
而家多咗一個人行catwalk我真係忍唔到笑出黎
好彩帶住口罩咋
如果唔係，啲人以為我係傻架喇
餅餅行過黎話要攞key比大妹，返屋企攞日用品比佢亞媽喎我第一個反應就話 : 佢無咩?
大妹已經係我隔離講 : 我無帶
當然佢係無叫我啦
餅餅居然成抽key，連埋我屋企條key都比埋佢
我好大聲咁叫住佢，攞返我地條key出黎呀
發神經架，萬一佢大妹唔返黎，又或者唔記得比返我地咁我地點返屋企呀?
等得唔耐煩，同餅餅講我好口渴
去咗星巴克飲嘢
太悶玩自拍
芒果慕司蛋糕，芒果味好假，蛋糕好好食
草莓明林頓，呢個勁好食，真係好好食
打電話比餅餅妹妹
原來已經上咗病房
一齊入咗去之後
比個護士話我地 : 呢度唔可以咁多人架，搵啲人出去先啦
我第一個出去啦
坐係出面無無聊聊，又影下相打發時間啦
餅餅妹妹都好肚餓，所以買咗包薯片食
但食咗幾塊之後
就話喉嚨痛，唔食喇
大妹上到黎見到我
但個一刻我坐咗係到
個頭望住個窗
大妹走過黎
用隻手係我對眼前面甩一甩問 : 亞媽係邊到呀
我好好禮貌咁答佢 : 係4-6號房中間個張床
之後佢唔該都無聲就入咗去
換咗餅餅出黎
我即刻同佢投訴你個妹頭先叫都唔叫我呀
究竟有無當我係佢亞嫂架?
(我入咗門咁耐，佢大妹一句亞嫂都無叫過我
唔好話亞嫂喇，連我個名都無叫過呀)
餅餅仲要答我 : 佢係咁架啦
咁我就話 : 咩家教黎架，咁好家教呀?
其實每一次見到佢大妹佢大妹咁樣對我
而我每一次都同餅餅講
餅餅都話佢係咁架喇
為咗唔好再令到自己唔開心
我決定避開佢大妹
佢係到嘅話
我一定唔到
但今次奶奶入咗醫院
避唔到喇..........
