我呢啲真係攞黎賤,明知奶奶對我唔好,就應該少啲見,避免傷到自己嘅心,無錯,可以話我自私;自我,我唔介意,但我好介意比人玩......
1月6日(二),晚上餅餅突然同我講明晚返青衣食飯,聽完呢句,我心諗,咁我之前plan好晒明晚要做嘅嘢咪做唔到?唉!算啦~~~探下奶奶都好嘅,都就黎新年喇,我地之前去工展會時,都買咗包冬菇比佢,攞埋過去啦。
1月7日(三),呢日仲約咗人交收,交收過程實在太煩喇,亦唔想再提,不過我遇到一個大好人,完全可以話就晒我嘅時間,最終6:30係香港站交收。
最慘我無得幫佢評分,因為佢post上網個樣嘢,唔係以上嗰啲,所以無得幫佢加分。
去到青衣,驚佢屋企無嘢飲,我就去咗7-11買枝檸檬茶少甜先,好耐未飲過喇。
返到屋企,原來大妹,大妹夫&勤姨都係到,仲要食咗飯,咁我食第二輪呀?無錯,我同餅餅食第二輪,好彩唔係食餸尾,奶奶有幫我地夾起啲餸。
我地放底個袋期間,送咗啲嘢比奶奶之後,奶奶問我:飲湯定食飯呀?
我話:飲湯吖,唔該
奶奶就話:啲湯唔啱你飲喎,我今日煲雞燉(唔記得咩)茸湯
咁我就話:咁我食飯囉
奶奶就"不"湯比餅餅飲,一邊"不"一邊就話,多一碗都無呀,對住我同我講:你想飲都無呀
咁我就話:好彩我唔飲囉,我啲眼淚都就快標出黎,good一聲吞落去。
坐係到,見到枱面有四碟餸,有一碟係蝦,所有人都知我鍾意食蝦,我唔明點解奶奶有以下舉動
奶奶話:啲蝦用莞茜炒過,你唔食架,跟住成碟蝦攞走咗
當下我真係想走,但實在太無禮貌,我忍,餅餅可能確得無問題,所以佢由頭到尾,都無講過一句說話,亦繼續抺老爺個神位。
到我同餅餅食飯時,得個三碟餸,一碟菜心,一個蠔油蒜頭炆冬菇,一碟煎雞翼。有睇開我個blog或者係我嘅朋友都知道,我爹地媽咪屋企,每次我返到
去,4
個人食飯,最少都有8-10碟餸,一大煲湯,一大煲糖水,甜品,排住隊等我去食。少餸都算啦,話明第二輪,夾起啲餸,都唔會話熱住啲餸,天氣咁凍,仲要我
食啲冷冰冰啲餸菜,個一刻,我覺得自己好悽涼。
仲要係食飯期間,餅餅同奶奶鬧大交,咁我可以點?我唔出聲,一路食白飯一路睇電視,因為啲餸,不單止凍,仲要好難食,好彩有枝檸檬茶,不過啲雞翼好好味喎,係凍咗啲,一問之下,原來係出面買的
餅餅同奶奶鬧完交之後,大妹&大妹夫就走喇,呢個時候,奶奶就不斷抄我上面相片個啲嘢,又唔係唔見得人,我由佢,最後餅餅忍唔住出聲話係我嘅,奶奶至停手。
跟住奶奶就不斷問我食唔食橙呀?
我話:唔食
奶奶話:食啦,好甜架
我話:唔食,我屋企個啲仲甜呀
跟住奶奶又問我要唔要tissue呀?攞盒返屋企吖
我話:唔要
奶奶又問:要唔要筆呀?
我話:唔要
坐咗半個鐘都無,我真係已經忍受唔到喇,我彈起身同餅餅講:走喇,好彩,餅餅見我黑晒口面,都知咩事,就同我走喇。
一出到門口,餅餅就問我飽唔飽?我就好悔氣同佢講:你話呢?之後我地去咗青衣城食mos burger。
心裡依然唔開心,依然未平伏,專登遲啲出呢篇blog,等自己淡忘一點,唔好記住唔開心個一點,但事與願違......鑽了牛角尖,不停問自己,仲乜要咁刻薄我?點解明知我鍾意個啲佢唔比我?我都係佢屋企人吖,點解要對我咁差?
